Shillong, Ïaïong 17: Namar ka jingshah ktah kaba jur bad la duhnong palat ki nongri sniang ha ka jylla bad khamtam ha them Ri Bhoi na ka jingwan lynshop ka khlam African Swine Flu (ASF), ka Hill Farmers Union Central Body mynta ka sngi ka la leit syndon ban ïa kynduh ïa u Bah Fedrick Kharkognor, Principal Secretary ka Animal Husbandry and Veterinary ryngkat ka jingaiti ïa ka jingtoh ba ka sorkar kan shim khia halor kane ka jingshah ktah ki nongri Sniang.

Ha kane ka jingleit kynduh la ïalam da u Bah Alfondbirth Kharsyntiew kum u General Secretary ka Hill Farmenr Union Central body bad la ïa dong lang ruh u Bah Stevenson  Nongkhlaw President Laikroh Block, u Bah Pynshai Masharing Secrerary HFU Ribhoi District lem bad kiwei kiwei ki dkhot.

Ha kane ka jingïakynduh, ka Seng ka la pynpaw ruh ïa ki jingshah ktah ym tang na ka jinglynshop ka African Swine Flu bad ki la pynpaw ruh halor ka jingshah khnit dor haba die ïa ki Sniang na sem, ka jingrem palat u jingbam Sniang, ka jingbym biang ki dawai dashin ha Dispensary, ha kaba kine ki la buh jingeh ruh wat ïa ki nongri sniang ban siew ïa ka ram kaba ki shim na ki Bank kaba la buh ïa ki hapdeng ka jingkut lad.

U Secretary ka HFU Central Body u Bah Alfondbirth Kharsyntiew, la ong ha kane ka jingïakynduh u Bah FredRick Kharkongor kum u Principal Secretary Animal Husbandry and Veterinary u la kular ban shim khia ïa kine ki mat ba la pynsngew bad u la phah ktien ruh ïa u Director Animal Husbandry & Veterinary ban lum da ka jingïalang bad baroh ki nongri sniang kiba don ha ki kynhun bapher bapher na ka bynta ban ïamir jingmut bad pyrshang ruh ban ïarap ïa ki katto katne ki mat kiba lah ban leh kham kloi.