Shillong, Ïaïong 20: Katba ka Green Tech Foundation ka la pyrshah jur bad dawa na ka sorkar jylla ba dei ban pynduh pyndam noh ïa ka Projek jong ka Taj Resort and Spa ha Umiam bad ruh ba u Secretary ka GTF mynta u dang ïaid shakhmat ban shah thngan ban pynpaw ïa ka jingpyrshah ïa katei ka Projek ha Umiam, hynrei naka liang ka Synjuk ki Rangbah shnong Ri Bhoi District mynta ka sngi ka la leit ban kynduh ïa u Symbut Myntri ka sorkar jylla u Bah Prestone Tynsong ban ai ka jingkyrshan ïa ka Taj Resort and Spa ha Umiam bad phah pynkut noh ïa ka projek ha ka dewlyngnong Lumpongdeng.
Na ka liang ka Synjuk ki Rangbah Shnong Ri Bhoi District haka jingïalam u President u Bah B. B Makdoh bad u Bah P.B Sylliang kum u Secretary ryngkat ki dkhot ki la leit ban kynduh ïa u Symbut Myntri Rangbah ka jylla bad na ka liang kane ka synjuk ka la ai ka jingkyrshan ïa ka sorkar ban tei ïa ka Taj Resort and Spa ha Orchid bad ban pynduh pyndam noh ïa ka projek kaba ïadei bad ka Dewlyngnong Lumpongdeng.
Haba kren sha ki lad pathai khubor, u President bad Secretary ka Synjuk ki la pynpaw na ka liang ka Synjuk ki kloi ban ai ka jingkyrshan ïa katei ka Taj Resort and Spa ha Orchid, da kaba kam ba ka jingwan kane ka Taj resort ha Umiam kan long ka jingkyrkhu ïa ki paidbah nongshong shnong ka Ri Bhoi bad khamtam ïa ki 5 tylli ki Dorbar Shnong ba hap ha ka Pung Umiam.
Ki la pynpaw ruh ba ka jingdon jingwan kane ka Hotel baheh lane ka 7 star Hotel kan long ka jingkyrkhu ym tang ha ka liang ka ioh kam ka ioh jam, hynrei kane kan ïarap ruh ïa ki nongrep bad a ka jingdon kane ka Hotel ka hap ban shim ïa ki mar rep ba pynmih da ki nongrep na Ri Bhoi District ba bun ki paidbah ha Ri Bhoi District ki im ha ka rep ka riang.
Shuh shuh, ki la ong ruh ba ka Synjuk ka la ai jingmut sha ka sorkar ba ïa mynta shipor kin sangeh shuwa ha kaba ïa dei bad ka projek ha dewlynnong Lumpongdeng bad kin ïaid shakhmat tang ïa ka Taj Hotel and Spa ha Orchid, namar lada ka sorkar ka pynduh pyndam noh ïa kane ka projek kan long ka jingduhnong ïaka Ri Bhoi kaba don ruh wat ïa ka Airport hajan ba bun ki nongjngohkai pyrthei kin wan tuid ban myntoi ki paidbah bad lada pynduh pyndam noh ïa kane ka projek bun ruh kiba la tyrwa ai jaka shawei.