Nongpoh, Ïaiong 20: Ka Ri Bhoi Tourism & Environmental Development Forum, lyngba u Chairman, u Bah Plielad Tiewsoh, u la pynkynmaw biang ïaki paidbah ba ka Forum kan pynlong biang ïa ka ‘Ñiangtaser Festival’ kaba ju pynlong shisien saw snem, ka tamasa lehkmen kaba la paw bad tip paidbah ïa une u khñiang kum u Kniang World Cup, uba mih na ki thaiñ Ri Bhoi.

Katkum ka jingïathuh u Bah Plielad Tiewsoh, ïa kane ka tamasa yn pynlong ha ka 8 bad 9 tarik u Jymmang ha Ïewsier, kaba don marjan bad ka Nongkhyllem Wildlife Sanctuary, ryngkat ka jingïasnohktilang bad ka Dorbar Shnong Saiden.

Ha kine ki ar sngi jong ka tamasa, yn don shibun ki prokram bapher bapher kiba kynthup ïa ki jingïalehkai, ki prokram pynbyrngia bad ki jingpyninam ïaka riti ka dustur. Kine ki kynthup ïa ka jingïakop shad tynrai, jingrwai tynrai na ki Raid bapher bapher, ka jingïakop kynjat ball, ka jingïakop khwai dohkha bad ka jingïakop pyni riam tynrai, kum shi bynta ban pyni paidbah ïa ka sap, ka kolshor bad ka riti dustur jong ka thaiñ Ri Bhoi.

Nalor kane, ka Forum ka la pynkhreh ruh da ki Dara (tent) na ka bynta kito kiba kwah ban sah miet bad ban shim bynta pura ha baroh ar sngi jong ka tamasa.

Ka Forum ka la khot bad wer paidbah ïa ki nongshong shnong bad ki nongwan jngohkai ban wan sakhi lang ïa kane ka tamasa Ñiangtaser, da kaba pynpaw ba yn don bun ki prokram bapher bapher kiba yn pynsngewbha bad pynbyrngia ïa baroh kiba wan.