Nongpoh, Ïaïong 22: Ki nongïalam ka State BJP ba la lamkhmat da ka Kong Daniala Nonglait kaba dei peit ïa ka Ri Bhoi bad ka Anzie A. Sangma kum ka State Secretary ka BJP mynta ka sngi ki la pynlong da ka jingïakynduh lang ki Longkmie na Ri Bhoi District ban pyrshah jur ïa ki Nongïalam ka liang pyrshah ha Lok Sabha kiba la khang lad ban pynlong ain ïa ka Women’s Reservation Bill, 2026 (Nari Shakti Vandan Adhiniyam) ha ka 17 tarik u April 2026 ba la wan rah da ka sorkar BJP ban pynkup bor ruh ïa ki Longkmie.

Ha kane ka jingïalang la wan shim bynta lang ruh u District President ka BJP u bah Sen Thabah, u State President ka BJP Morcha u Himanta Tmung lem bad kiwei kiwei ki nongïalam na ki Mandal ha Ri Bhoi District.

Kane ka jingïalang kaba ki la pynlong ryngkat ki Longkmie na Ri Bhoi, ka long beit thik ban pyrshah ïaki nongïalam ka Liang Pyrshah ha Lok Sabha naduh ka Congress, ka TMC, RJD bad kiwei kiwei ki party kiba la khanglad ban pynlong ain ïa katei ka Bill, kaba phai khmat kyrpang ïa ka hok ki longkmie ban ioh mihkhmat ha Lok Sabha ne wat ha ki State Assembly.

Na ka liang ka Kong Daniala Nonglait kum ka State Secretary ka BJP, ka la pynpaw ba kum ki longkmie na Meghalaya ki pyrshah jur ïa kane ka jingkhanglad ki nongïalam ka liang Pyrshah ha Lok Sabha ban pynlong ain ïa katei ka Bill ba la wan rah da ka sorkar BJP ban pynkupbor ïa ki Kynthei ne ki Longkmie, khamtam kum ha Meghalaya ba ïa ki Longkmie la dep pynkupbor lypa lyngba kata ka Matrilineal Society.