Nongpoh, Ïaïong 22: Haduh 45 tylli ki skul na kylleng ka thain Ri Bhoi ki la wan ban shim bynta ha kawei na ka lympung ïalehkai sports ba la tip kum ka ‘District Level Inter School Sports Meet 2026’ ba la pynlong da ka ophis u District Sports Officer ka Ri Bhoi ha madan NSCA Pahamsyiem ha Nongpoh.

Kane ka lympung ïalehkai sports ki khynnah skul ka dei lai sngi kynthih kaba la sdang mynta ka sngi bad ka ban sa kut ha ka 24 tarik u Ïaiong 2026 bad ïa kane ka Sports Meet ki khynnah skul la wan ban plie pyrda da u Bah Orville Massar, Additional Superintendent of Police ka Ri Bhoi kum u kongsan bad la sakhi lang da ka jingdon lang u District Sports Officer ka Ri Bhoi u Bah Boby Nongbet lem bad kiwei ki ophisar, ki nonghikai bad ki khynnah skul.

Haba kren kum u kongsan ha kane ka jingplie pyrda ïa kane ka sports Meet, u Bah Orville Massar u la ai mynsiem ïa ki khynnah skul ban shim bynta da ka mynsiem jong ka jingieit bad ruh ban buh ïa ka thong ba kane ka jingïalehkai sport kan long kum ka rynsan ba kin ioh sei madan ïa ki sap ki phong bad ruh lada ki don ïa kita ki sap ha ka kam ïalehkai sport ka jingïalehkai sports kan long ka lad kamai ïa ki.

Ha kane ka sngi sdang la pynïalehkai da ki jingïalehkai bapher bapher kum ka 100 metre race, ki longjup, high jump bad kiwei kiwei ki jingïalehkai, ha kaba ki khynnah skul ki la shim bynta shitrhem ban ioh khur ïa ka jingjop.

Ha ba sdang ïa kane ka lympung, naka liang ka ophis u District Transports Officer ka Ri Bhoi  ka la pynlong ïa ka jingsngap jar kaba shi minit  ban kynmaw burom ïaka Retina Hanse ka samla kaba la kyntiew ïaka burom jong ka District haki kam ialehkai Sports kaba dang shu khlad shen naka jingjia Aksident.