Nongpoh, Ïaiong 25: Ha ka jingïalang ba la long mynta ka sngi, ha Shnong Saiden, u Acting Sordar ka Nongpoh Elaka Sirdarship, Bah Luistar Lyngdoh, u la pynskhem ïa u Bah E.J. Myrthong kum u Rangbah Shnong ba pura, da kaba aiti ruh ïa ka syrnot jong ka bor pynïaid shnong bad pynspong ruh ïa u kum u nongïalam ba thymmai.

Ha kajuh ka sngi, la pynskhem ruh ïa u Bah Shemphang Kharlukhi kum u Secretary shnong ba thymmai, hadien ba u la shah jied da ki paidbah ha ka jingjied paidbah ba la long myn ha ka 25 tarik Lber 2025. Ha kane ka sngi la sakhi lang ruh u Bah Vincent Makri, Finance Secretary ka Nongpoh Elaka Sirdarship bad u Bah S. Sohkhwai, Lyngdoh ka Raid Sohkhwai, kiba la sakhi ïa kane ka jingpynskhem.

Kane ka jingpynkup bor ïa kine ki ar ngut ka dei hadien ba ki paidbah ka shnong ki la pynpaw ïa ka jingshaniah jong ki lyngba ka election, da kaba jied ïa ki ban shimti ïa ki kam shnong kum u Rangbah Shnong bad Secretary.

Shuh shuh, ka Shnong Saiden ka dei kawei na ki shnong ba pawnam ha Ri Bhoi, kaba dang shen ka la rakhe ïa ka jingdap 125 snem jong ka jinglong shnong. Ka shnong ka la mad ruh ïa ka jingduh noh ïa u Rangbah Shnong barim, Bah E.K. Lapang, bad hadien kata la thung shipor ïa u Bah E.J. Myrthong kum u Acting Rangbah Shnong, uba la bteng ïa ki kam shnong haduh ban da pynlong ïa ka jingjied thymmai ha ka 25 tarik Lber 2026, ha kaba u paidbah u la jied biang ïa u kum u Rangbah Shnong ba pura.

Haba ai jingkren ha katei ka jingïalang, u Bah Myrthong u la pynpaw ïa ka jingsngewnguh ïa U Blei bad ïa ki paidbah kiba la ai ka jingshaniah ha u. U la ai jingïaroh ruh ïa ki jinghikai bad ka jingïalam lynti jong u Rangbah Shnong barim, kiba la long ka nongrim ha ka jingïaid lynti jong u.

U Bah Myrthong u la ong ruh ba un ïai don ryngkat bad ki paidbah bad u la khot ïa ki nong shnong ban ai ka jingïatreilang, khnang ba yn lah ban kyntiew ïa ka burom bad ka nam jong ka shnong, bad ban wanrah ïa ka jingshong suk bad shing shngaiñ ha shnong ha thaw.