Nongstoin, Iaiong 25: Ki pulit ka thanad Nongstoin ha ryngkat ka kynhun jongka Anti Narcotics Task Force (ANTF) ki la ioh ban kem noh ar ngut ki briew halor ka jingsuba khaïi drok hadien ka jingpynapshrip hajan ka shnong Nongkasen.

Katkum ka tyllong khubor ba la ioh lum, la iathuh ba jingiohkem kitei ki ar ngut ki briew ba la tip kyrteng kum u Biangdorlang Lyngdoh Nonglait bad u Morningstar Lyngdoh Rngaid na West Khasi Hills kadei hadien ki bor syntiat haka miet jongka 23 tarik, ki la ioh jingtip ba kila don kiba leit da ka thuk thuk kaba don ia u registration number AS16D6246 ban leit thied drok na nongbah Shillong.

La ioh jingtip ruh ba katba ki bor pulit ryngkat ka kynhun ANTF ka dang pynap shrip, kala wan katei ka thuk thuk kaba la suba bad tang mar ia iohi ia ki pulit, u nongniah ula pyrshang ban phet krad na katei ka jaka bad leit ban iehnoh iaka thuk thuk ha ki bynta jongka shnong Sohphria bad phet rieh ialade da kaba shim kabu iaka jingdum jongka miet.

Naka liang ki pulit ryngkat ka kynhun ANTF kiba la buddien ia katei ka thuk thuk, ki la pynlong iaka jingkhynra ha katei ka jaka bad lyngba ka jingiarap jong ki briew shnong, la ioh ban kem noh ia u Biangdorlang Lyngdoh Nonglait katba ia u drok u la dep ban bret noh.

Haba bteng iaka jingkhynra haka step kaba bud, kata haka 24 tarik, ki pulit kila ioh ban kem pat sa ia u Morningstar Lyngdoh Rngaid bad haka jingwad bniah ryngkat ka jingiarap ki ksew K-9, la lap noh ia ar tylli ki pla rong saw kiba la suba thep drok. Ha ka jingdon ki nongsakhi, la plie ia katei ka pla bad lap ia ar tylli ki synduk sabon kiba la thep ia u drok Heroin.

Ka jingkhia jong kitei ki drok hapoh kitei ki ar tylli ki synduk sabon ka long 19.69 gram bad ka liang ki pulit ki kem noh ia kitei ki ar ngut bad la register case iaki hapoh ki kyndon jongka Narcotic Drugs and Psychotropic Substances Act, 1985 bad ka jingtohkit halor kane ka kam, ka dang iaid shakhmat.