Nongpoh, Iaiong 25:Sa shisien pat ka Dorbar Raid jong ka Raid Marngar mynta ka sngi kala pynlong biang ïaka lehniam pomblang kaba dei ka jinglehñiam bala ju pynlong man la u snem ha Ïewmawlong ban kyrpad kyrpon ïa u Blei trai kynrad u nongbuh nongthaw, ban ri ban sumar sukher ïaki khun ki hajar kumjuh ruh ki nongwan ïew wan hat khnang ban bit ban biang ka khaii ka pateng, ka rep ka riang, ban ïada ïaka leit ka wan, ki kam ki jam jong ki khun ki hajar, ryngkat ka pule ka puthi ki khun samla hapoh ka Raid.

Ïa katei ka jinglehñiam pom blang la sakhi ruh da ka jingdonlang u Pa’iem Richard Syiem, Syiem ka Raid Marngar, ki longsan mansan jong ka Raid, u Basan Nongkseh, Basan Nongumlong naka Hima Mylliem kiba peit bad khmih ruh ïaka Raid Marngar ryngkat ki nongwan ïew kiba wan ban sakhi ha katei ka sngi.

Kum ban shu pynpaw ba ha katei ka lehñiam pomblang la pyndonkam ruh da uwei u Blang lieh, u Syiar ryngkuh ba saw bad ka syiar kynthei baiong kawei, bad kane ka jinglehñiam lehrukom pom blang la leh tang haka sngi ba long ïew Mawlong hakhmat u mawñiam mawrukom ba don hakhmat ka iing Dorbar jong ka ïew bad ïa kine ki mawbynna bad ki mawñiam mawrukom ba don ha katei ka ïew u Syiem bad ka Dorbar Raid ki ju sumar sukher man la u snem bad ban pyndep ïaka lehñiam lehrukom bad ka kñia ka khriam.

U Pa’iem Richard Syiem haba kren ha kane ka sngi u la ong ba kane ka jinglehñiam shisien shisnem ka long naka bynta ban bit ban biang ki khun ki hajar, ka rep ka riang, ki nongleit ïew leit hat, bad kane ka jinglehniam ka dei naduh kulong Kumah kumta ngim dei ban klet bad ngi leh ban pyndep man u snem ha u bnai ïaiong bad lyngba kane ka sngi katkum ki sakhi satar ki paw shai ba une u snem u dei uba bha naka bynta ki khun ki hajar.