Nongpoh, Iaiong 25:Ka Dorbar Shnong jong ka shnong Umkadhor haka thaiñ Western Ri-Bhoi mynta ka sngi kila mih paidbah naduh ki khynnah skul bad ki nongshong shnong ban pynkhuid ïaka wah Umphung kaba don ha katei ka shnong kaba dei ka wah kaba bun ki dohkha dohpnat bad ka wah kaba ki paidbah nongshong shnong ki pyndonkam ban sum ban sait bad kiwei kiwei ki kam ki jam.

Haba kren sha ki lad pathai khubor mynta ka sngi u Bah Adreas Tron Sordar ka Shnong Umkadhor u la ong ba naka liang ka Dorbar kala shimkhia ïa katei ka kam ban pynkhuid ïa katei ka wah ka long shibynta ban pynneh pynsah ïaki dohkha dohpnat namar kadei ka wah kaba ai jingmyntoi ïaki paidbah nongshong shnong ha kaba ki paidbah nongshong shnong da ka jingkitkhlieh mynta ka sngi kila mih ryntih ban pynkhuid ïa katei ka wah.

Lyngba kane ka sngi naka liang ka Dorbar Shnong kala buh ruh ka jingmana ba ym shah ban dusmon ne pyniap pathar ïaki dohkha dohpnat ha katei ka wah bad kino kino kiba pynkheiñ ïaka aiñ kin ngat haka kuna.