Nongpoh, Iaiong 25: Ka seng ba paw khmat jongka Ri Bhoi, ka Ri Bhoi Youth Federation (RBYF) hynnin ka sngi kala ioh ban iarap pisa kumba T. 30 hajar shaka kynhun ialehkai jongka Meghalaya Martial Arts Federation (MMAF) kiba la leit ban mih khmat iaka jylla shaka 10th National Kungfu Championship 2026 kaba la pynlong haka University of Science & Technology, Meghalaya (USTM).

Katei ka jingai jingiarap ka seng kadei hadien ba ka kynhun jongka MMAF hapdeng ka jingduna ka pisa tyngka, kala leit ban kynduh ia u Bah Bipul Thangkhiew, President ba rangbah ka seng ban pan jingiarap hashwa ba kan leit iakhun sha katei ka lympung.

Ha katei ka sngi la wan ban iadon ryngkat naduh ki nongialam sengkmie ka seng ba kynthup ia u Bah Bipul Thangkhiew President, u Bah Denis Syngkli General Secretary, u Bah Wanpher S Wahlang Publicity Secretary nalor kiwei de ki nongialam ka seng, ki nongialam ka MMAF ba kynthup ia u Bah Thomas Rongthaluh President, u Bah Benison Shadap General Secretary bad kiwei kiwei de nalor 40 ngut ki rang ialehkai kynthei bad shynrang.

Kum ban pyntip hangne, ka lympung ialehkai 10th National Kungfu Championship 2026 kadei kaba la pynlong ha USTM naduh hynnin ka sngi, kata ka 24 tarik ter ter haduh ka 26 tarik jong u bnai Ïaiong, kata lashai ka sngi.

Halor kane ka bynta jongka jingsbun mynsiem bad donkti ban iarap iaka kynhun ialehkai wat hapdeng ka jingkhim bad lyngkot jongka por, ki nongialam ka MMAF ki la pynpaw iaka jingsngewnguh bad jingkhublei ba kyrpang ba ka seng kan nang lah ban kiew shaphrang bad ioh iaka jongkoit jingkhiah ba kin nang lah shuh shuh ban shakhri khambha shuh shuh haka imlang ka sahlang.