Kliehriat, Ïaïong 29: Ban pyrshah jur halo rka jingthmu pynlong ïa ka Public Hearing ba la pynbeit ban pynlong ha ka 22 tarik u Jymmang 2026 da ka Sreee Cement Limited ha lum Syrman, East Jaintia Hills, ka Hynniewtrep National Youth Front (HNYF) East Jaintia Zone mynta ka sngi ka la ai da ka dorkhas sha u Deputy Commissioner ka East Jaintia Hills ban pyrshah halor katei ka Public Hearing.

Ka HYNF ka la pynpaw, ba ka daw kaba la pynlong ïa ka seng HNYF ban pyrshah ïa katei ka Public Hearing na ka bynta ban tih mawshun katei ka Company, ka dei halor ka Nongrim ba lada tih Mawshun kan ktah ïa ka  wah Litein kiba don shibun ki kynja dohum bad ba katei ka wah ka dei ruh ka jingim jong kiba bun ki nongshong shongshnong.

La pynpaw ruh ym tang ba ka ktah ïa ka wah bad ïa ki nongshong shnong kiba pyndonkam ïa ka wah, hynrei kan pynjaboh ruh ïa ka wah  lyngba ki jaboh kiba tuid na katei ka jingtih mawshun.

La bynrap ruh ba ka Company Cement ka pynmih shibun ki pump um bad ki jaboh kaba lah ruh ban ktah ïa ka koit ka khiah ki paidbah, khamtam ki khynnah bad kiba la noh ka rta bad ka jingpyndonkam bun ïa ka um da ka Company kan ktah ruh ïa ka jingkyrduh um hapoh ka wah.

Ka seng ka la pynpaw ruh haduh kine ki sngi ym pat iohi satia ba ki Company kin ai jingmyntoi ïa ki trai jaka bad kine ki Company ki wan tang ban shna pisa bad pynjot ïa ka mariang.

Haba pynkut, u President ka HNYF East Jiantia Zone u Bah Salty Ryngkhlem u la ong haduh mynta ki Factory ne ki Company kim ai jingmyntoi ei ei ïa ki trai muluk ki trai jaka bad ka jingwan jong ki ka long tan ban shna pisa bad ban pynjot ïa ka mariang. Ka seng ka la buh ruh ka jingkyrpad ïa ka bor synshar District ban nym ailed ïa katei ka Public Hearing kumba la pyrshah da  ki paidbah bad lada ki bteng ban pynlong ïa ka public hearing na ka liang ka seng kan sa shim da kiwei ki lad kiba tyngeh ban ïada ïa ka hok ki paidbah bad ruh ban ïada ïa ka mariang.