Mawkyrwat, Jymmang 02: Katba ka jylla Meghalaya ka la dang jam ban poi noh sha jingpynthymmai biang ïa ki nongmihkhmat sha ka ïing Dorbar thaw aiñ hapoh ka jylla ha u snem 2028, ki heh nongïalam ka National People’s Party (NPP) mynta ka sngi ha ka jingïalam u State President ka NPP u Bah Prestone Tynsong ki la hiar sha Mawkyrwat na ka bynta ban pdiang burom da ki hajar ngut ki nongïalam ka UP, HSPDP, Congress bad VPP ha ka jingïalang kaba la long ha Madan Nativity Mawkyrwat.
Haba leit ban pdiang sha ka sem jong ka NPP, ïa kitei nongïalam ka UDP, Congress, HSPDP bad VPP, nalor u Bah Prestone Tynsong kum u State President ka NPP, kiwei kiwei ki heh nongïalam ka NPP ki kynthup ïa u Bah S. Sohtun, Myntri ba peit ïa ka tnat C&RD, ki MLA ka NPP ka kong Ampareen Lyngdoh bad u Dr. Celestine Lyngdoh, u President ka NPP Mawkyrwat Block, u Dr. K.K. Nongsiej lem bad kiwei de ki heh nongïalam ka NPP party.
Ha kane ka sngi, ki nongïalam ka UDP Mawkyrwat Circle ryngkat ki Nongkyrshan ki la pynïasoh ïa lade sha ka NPP bad na ka liang u nongïalam ka HSPDP bad kynthup ruh ïa Kyrtong ka HSPDP ha ka election KHADC ba dang shu dep shen u Bah Poland Sohphoh ruh u la pynïasoh ïa lade sha ka NPP ryngkat ki nongkyrshan jong u.
Kum ban pynpaw, kane ka jingwan kyrshan kiwei ki nongïalam bad ki nongkyrshan na kitei kiwei ki seng sain pyrthei ka pynpaw ba ka NPP ka don ka jingkyrmen ban jop ha ka election 2028 bad kane ka paw shai ruh ba wat u MLA ka Mawkyrwat uba bati aka kyrdan myntri ka tnad PHE u Bah Renikton L Tongkhar una lah ban pynïasoh sha ka NP hadien ba la kut ka samoi treikam.
Haba phai dien, lah ban pynkynmaw ruh ba u Bah Renik nyngkong eh u la ïakhun ïa ka ilekshon MLA ha u snem 2013 na ka NPP kata hashwa ba un sa pynïasoh bad jop ilekshon na ka HSPDP ha u snem 2018 bad na ka UDP pat ha u snem 2023.
Na ka liang u Bah Prestone Tynsongh haba kren ha kane ka sngi u la pynpaw ïa ka jingkmen halor ka jingwan pynïasoh kitei ki nongïalam bad ki nongkryshan na kiwei ki seng sain pyrthei sha ka NPP bad la kyntu jur rurh ba kin wad bniah ïa ki Nongrim treikam ka NPP kaba dei ka party kaba trei solonsar na ka bynta ki paidbah.
Kum u nongïalam ka NPP u Bah Prestone u la pynpaw ruh ïa ka jingsngewkhia bad kynthoh jur ruh ba bun kiwei ki nongïalam sain pyrthei ha ka jylal ki la pyrshang ban ïalam bakla ïa ki paidbah ka jylla da kaba kynnoh ba ka sorkar MDA-2 ka dei ka sorkar Nongtuh, kaba dei tang na ka bynta ka jingmyntoi sain pyrthei jongki bad u la kyrpad ruh ïa ki nongthep vote na Mawkyrwat Constituency bad na South West Khasi Hills District ba kim dei ban shah ïalam bakala bad ki dei ban pynshongnia ïa lade halor ki kam ba la trei da ka NPP party.
Lyngba jong kane sngi la ai jingkren ruh naduh u General Secretary ka UDP Mawkyrwat Circle, u Bah S.K. Budnah bad u kyrtong ka HSPDP ha ka elekshon KHADC ba dang shu dep, u Bah Poland Sohphoh, ki la pynpaw ba ka Nongrim kaba ki leit pynïasoh sha ka NPP, ka dei namar ba ka sorkar MDA-2 ha ka jingïalam u Mytnri rangbah ki la don shibun ki kam pynroi bad ka jingkylla ba u paidbah u la ioh jingmyntoi ha ka jylla.