Nongpoh, Jymmang 4: Hapdeng shibun ki jingeh bad jingïakhun ha ka jingim, uwei u samla na Ri Bhoi u la lah ban pynpaw ïa ka jingtrei shitom jong u da kaba rung ha ka thup Top 10 ha ka eksamin HSSLC ba la pynmih da ka MBOSE mynta u snem.

Une u samla u dei u Starwell Ronghang, uba pule ha St. Paul’s Hr. Sec. School, Nongpoh bad uba shnong ha Purduwa. Ha ka result ba dang shu pynbna paidbah, u la wan ha ka kyrdan ba 9 ha ka jylla da kaba ïoh 433 marks bad khur Star Marks ha baroh ki subject ha ka Arts stream.

Ka jingwanrah nam jong une u samla ka la pynlong ïa ka skul bad ka thaiñ ban dap da ka jingsngew sarong, ha kaba ki nonghikai, ki para khynnah bad ki bor pynïaid skul ki la pynkup burom ïa u da ka jingïaroh kaba khraw ha phyllaw skul.

Haba kren halor kane ka jingïoh, u Starwell u la pynpaw ïa ka jingsngewkmen bad ai khublei ïa u Blei lem bad ki nonghikai bad ki bahaiing kiba la kyrshan ïa u ha baroh ka jingïaid lynti jong u. U la ong ba ka jingïoh kam shym la wan suk hynrei ka dei ka jingmih na ka jingïai trei shitom bad jingïai minot thop.

U la ïathuh ruh ba ha ka jingïaid lynti jong u sha kane ka jingïoh ia kane ka jingjop ka long ba u la hap ban mad ïa ki jingeh kiba ktah ïa ka jingmut jingpyrkhat jong u, hynrei u la ïai bteng ban ïaleh khlem da sangeh haduh ban da ioh kheit ia u soh uba thiang ha ka jingim.

Naka liang ka Sister Anjellina CH Marak, Headmistress, bad ka Kong Sweety Shadap, Class Teacher, ki la pynpaw ïa ka jingsngewkmen kaba khraw bad ki la ai jingïaroh ïa utei u samla, da kaba kitbok kitrwiang ba un nang kiew shaphrang bad wanrah shuh shuh ïa ka nam bad burom ha ki sngi ban wan.