Jowai, Jylliew 26: Ka nongmihkhmat jong ka Saipung Sutnga konstitwensi ka East Jaintia Hills District, ka kong Santa Mary Shylla haba kren sha ki lad pathai khubor mynta ka sngi, ka la iathuh ba ka sorkar jylla ka ioh ia ka song pisa kaba T. 200 klur na ka sorkar pdeng ban shna pynbha ia ki surok.
Katei ka nongmihkhmat, ka la pynpaw ia ka jingsngewkhia halor ka jingjot rathai jong ka surokbah National Highway 6 ha ki bynta jong ka East Jaintia Hills District bad pyntip ruh ba ka jingshna pynbha ia katei ka surok, kan sdang hadien ka jingkut jong kane ka aiom slap bad ban pyndep hapoh u snem 2025. Ha kajuh ka por, ka Kong Santa Mary Shylla, kala buh ruh ia ka jingkyntu sha ki paidbah ka thain ba kin iai shah shwa shipor, namar na ka liang ka jongka ruh ka buddien bad shimkhia ia kane ka kam.
Kum ban shu kdew, ki paidbah nongshong shnong kane ka thain, ki la hap ban mih sha surok ban pynlong ia ka jingiakhih da ka jingpakhang surok kaba khlem buh por ha kine ki khyndiat sngi kiba lah dep noh, ban pynbor ia ka sorkar ba kadei ban maramot mardor ia katei ka surok bah National Highway 6 naduh na Tongseng ter ter shaduh sha Malidor kaba la jot rathai bad buh jingeh shikatdei ia ki paidbah nongleit nongwan.
Katei ka surok, nalor ka jingjot rathai bad ka jingbym shimkhia ka sorkar ban maramot, kala nang sniew shuh shuh ha kine khyndiat taiew hadien ka jingther jong u lapbah uba la neh da ki bun sngi lynter, kat haduh ba ki paidbah ki la kynnoh ba ym ikop shuh ban dang khot ia ka, kum kata ka surok bah lane ka National Highway namar ka jingdap da ki thliew ki syar bad buh jingma ruh ia ki paidbah kiba pyndonkam ia katei ka surok.
