Nongpoh, Jymmang 14: Ka trai jong ka Wankhar Indane Service ha Byrnihat, ka Gas Agency kaba pynbiang Gas ia ki paidbah ha ka thain Byrnihat ter ter shaduh ka thain Umtyrnga bad Khanapara, mynta ka sngi ka la pynshai paidbah halor ka jingthut ka rukom pynpoi Gas sha ki paidbah ba pyndonkam Gas bad ha kajuh ka por ka la pynrem ruh halor ka jingleit tur ki RBYF bad paidbah ha ophis treikam jong ka kaba don ha Byrnihat bad kaba la jia ha ka 9 tarik mynta u bnai.
Haba kren sha ki lad pathaikhubor, katei ka trai jong ka Wankhar Indane Service, ka la ong ba ka la ai jingshakri ia ki paidbah mynta la 21 snem khlem kano kano ka jingpynthut ia ki paidbah kiba pyndonkam Gas ha ka thain Byrnihat shaduh khanapara, hynrei ha kawei pat ka liang ka la pynpaw ia ka jingsngewkhia halor ka jingshah kynnoh ba katei ka Gas Agency, ka donkti ha ka ban die tuh ia ki tyndong Gas bad shah kynnoh ba bun jait, khamtam eh halor ka jingleit tur ki RBYF bad paidbah ha ophis treikam bad kaba la thut ka trei ka ktah ha katei ka Agency.
Shuh shuh, ka la ong ba ki paidbah ki dei ban sngewthuh ba na ka liang ka Agency ki ialeh ban pynbiang, hynrei naduh ba wan kane ka jingeh haba iadei bad ki Gas, ha kaba ka jingeh kam dei tang ha katei ka Agency hynrei ha baroh kawei ka ri bad kaba la pynlong ia ka India Oil Corporation(IOC) ka la hap ban pynjlan ia ka rukom ai ia ki Gas na ka 21 sngi sha ka 45 sngi.
Katei ka trai jong ka Wankhar Indane Services, ka pynrem jur halor ka jingjia kaba la jia ha ophis treikam jong ka bad ka jingshah pynjah burom ki nongtrei jong ka, ha kaba ki la shah byrngem byrsit, ha kaba kum ka trai kam lah satia ban pdiang, kumta katei ka trai ka la kyrpad ia kino kino ki sengbhalang ne ki riew paidbah lada don kano kano ka jingeh ki dei ban wan da ka sur ba jai jai bad ban iakren pynbeit bha halor kano kano ka jingeh.
SA PEIT RUH ||