Mawkyrwat, Jylliew 26: Ka Kong Ampareen Lyngdoh, Myntri kaba peit ia ka tnat ka koit ka khiah, mynta ka sngi ka la leit ban jurip ia ka Primary Health Center kaba don ha shnong Mawthawpdah, South West Khasi Hills District, kata ka dei hadien ba ka la ioh ia ka jingujor halor ka jingbym treikam bha katei ka jaka sumar ia ki paidbah.
Ha katei ka sngi, ba ka Kong Ampareen Lyngdoh, ka la hiar ban jurip ia katei ka PHC ha ryngkat ka jingsynranlang da u Bah Renikton L. Tyngkhar, MLA Mawkyrwat, u Bah Carness Sohshang, MDC Mawkyrwat, ki ophisar na ka tnat ka koit ka khiah lem bad kiwei.
Ka jingleit jurip da katei ka Myntri sorkar lem bad ki MLA bad MDC Mawkyrwat, ka dei ruh hadien ba ha kine ki khyndiat sngi ba la dep, la don ki kynhun sengbhalang, kiba la leit ban ujor sha ka halor ki jingduna kiba don hapoh katei ka PHC bad ruh kiba la pynpaw ba ka dang donkam shibun bah ki lad ki lynti ban nang pynïaid shaphrang ïa katei ka jaka sumar, khamtam ba ka dei ka jaka sumar kaba donkam eh na bynta ki paidbah jong katei ka thain.
Hadien katei ka jinghiar jurip, ka Kong Ampareen Lyngdoh, ka la pynpaw ba kan sa shimkhia ban leh eiei na bynta katei ka PHC, khnang ba kan long kaba ai jingmyntoi na bynta ki paidbah jong katei ka thain hi baroh kawei
