Nongpoh, Jylliew 26: Ka tnad excise na Ri Bhoi ha ka jingialam u Superintendent of Excise, u Bah R.C Lyngdoh lem ka kynhun bad ha ryngkat ka jingiarap lang ka tnad Excise na Assam ha ka ka sngi baar ha ka por 3 baje ei ei, ki la leit ban khynra naphang ia kawei ka Karkhana shna kyiad bad song kyiad beain kaba don ha ka Shnong Rajabagan, Byrnihat, ba la kynnoh ba ki pyniaid beain ban shna kyiad bad ban song kyiad na ka bynta ban shalan sha Meghalaya bad Assam.
Ka tnad Excise na Ri Bhoi ki la pynlong ia kane ka jingkhynra, ka dei hadien ba ki la ioh jingtip ba katei ka Karkhna ka la pyniaid kam ha kaba shna kyaid bad song kyiad khlem da don ka License bad khlem da ioh bor na ka sorkar.
Ha ka jingleit khynra ba kynsan ka tnad Excise la lap shisha ba katei ka karkhana ka la shna kyiad bad song kyiad beain bad na ka liang ka tnad Excise ki la ioh ban kurup shibun ka kyiad bad ki tiar ki tar ba pyndonkam da katei ka Karkhana bad ha kane ka jingkhyran ki la io kem ruh 12 ngut ki nongtrei bad kynthup 2 ngut kiba dei ki nongpeit nongkhmih ia kane ka kam.
Kumba la pyntip ruh da u Rangbah Shnong ka Rajabagan, u Bah Anant Timung, la ong ba wat ka bor shnong ruh kam don jingtip halor kane ka kam beain ban shna kyiad ne song kyiad bad wat ka NOC ruh kim shym la wan pan na ka Shnong. La shu tip ba kane ka Karkhana la khang naduh u snem 2018 ba ki pyniaid ha kaba shna Cashew Nuts bad kim tip pat ba ki la pyniaid da kaba shna kyiad ne song kyiad ha katei ka Karkhana.
Haba kren halor kane ka jingleit khynra, u Superintendent ka tnad Excise na Ri Bhoi, u Bah R.C Lyngdoh, u la ong ba ka tnad Excise ka la pynlong ia kane ka jingkhyra, ka dei hadien ba ki la ioh jingtip ba ka don kum kum kane ka Karkhana kaba pyniaid beain ha kaba shna kyaid bad song kyiad ban shalan sha Meghalaya bad Assam.
Ha kane ka jingkhynra, u laong ruh ba ki la kurup lut ia ki tiar ki tar, ki kyiad bad baroh ki jingdon jignem bad kynthup ia ka jingkem ia kitei ki nongtrei ban pynlong ia ka jingtohkit kaba bniah.
Shuh shuh, u la bynrap ruh da kaba ba ka jingdon kum kine ki karkhana beain ka long ka jingduhnong kaba khraw ia ka khajna ka sorkar bad na ka liang ka tnad excise kan sa shim da ki lad kiba tyngeh kiba long katkum ki kyndon jong ka ain, u la bynrap
