Nongpoh, Jymmang 20: Ngam shym la kmen haba wan ka jingtyrwa ban iakhun election, hynrei ba nga kwah ban don ka jingkitkhlieh na ka bynta ki daw ka jaid bynriew, ong u Dr.DRL Nonglait haba ialap election myntra ka sngi ha Iewmawlong Nongpoh.
Haba pan jingkyrshan na ki paidbah ka Ri Bhoi ban pynjop don burom ia u ha kane ka MP election shiteng Samoi na ka Shillong Parliamentary Constituency, u Dr. Nonglait u la ong ruh ba ka daw kaba u kwah ban iakhun election ka long ban wan rah ia ka jingiatylli ka jaid bynriew, ban pynneh pynsah iaki riti ki dustur bad kamtam ban pynim ia ka Ktien Khasi ban don noh ka jingithuh ym tang na ka sorkar jylla bad ban ithuh da ka sorkmie kum kata ka Ktien kyrpang haka khyrnit ba phra jongka riti synshar ka Ri.
U la phla ruh ba u don ka jingangnud ban long uta u Kyrtong jong ka bri u hynniew trep khlem da kynthoh iano iano ne ban wan rah ia kata ka jingiashrut hapoh ka jaid bynriew bad kaei kaba u angnud kum uta u nonghkai ha ka skulbah ka jylla, ka long ban lum ban lang bad ban pyniatylli ia ka jaid bynriew.
Shuh shuh, u la kren ruh halor shibun ki mat ki jura ka jaid bynriew naduh ki kam pynroi ban kyntiew ia ki nongrep, ka pule ka puthi bad kiwei kiwei ki kam pynroi bad kaba kham kyrpang u angnud ruh ban pynkup bor ia ki riew kynthei kiba long ki dkhot ka jaid bynriew.
Sa Peit Ruh |
