Nongpoh, Jymmang 23: Ka Samla Ai-Insara Makri ka khun samla na ka Shnong Mawtnum ka la ioh ban rah iaka cheque kaba 25 hajar tyngka ryngkat ka syrnot bad ka trophy hadien ba ka la long kum ka lahduh haka rynsan iakop pyni sap ka “Ribhoi Superstar Season 3” kaba dei ka sngi ia khun kaba khatduh lane ka Grand Finale kaba la long hynnien ka janmiet ha Parish Hall Nongpoh.
Ka Ribhoi Superstar ka dei ka rynsan ban ailad iaki khun samla ka them Ribhoi ban pyni iaka sap ka phong jong ki haka kam shad, ka kam rwai bad kiwei kiwei kaba la Pynwan dur daka kynhun kaba la tip kum ka L.S Syiemlieh Production kaba la long trai da u Bah Lansius Syiem bad uba long ruh kum u CEO jong ka Production.
Kane ka Kynhun jong u bah Lansius Syiemlieh daka jingthrang bad jingangnud ban kyntiew iaki riew don sap jong ka Dong bad ka Thaiñ Ribhoi ka la lah ban pynlong haduh 3 sien ia kane ka jingiakop lane ka Ribhoi Superstar, hakaba ka sien ka balai ka la kut Noh hynnien ka sngi daka jingsam iaki khusnam sha baroh ki nongjop.
Haba phai sha katei ka rynsan iakop knieh lahduh, ki la don haduh 13 ngut kynthup ïaka Kynhun bad Shimet kiba la ioh ban rung sha ka phainal bad baroh ki long shisha kiba don iaka sap kaba kyrpang naduh ki nongrwai, ki nongshad bad ki ba pynmih iaki sur jingtem na u ryndang lane ka Beat box.
Napdeng kitei ki samla kiba don shisha ka sap, la mih pat ka samla Ai-Insara Makri ha ryngkat u ryndang uba Siang ban rwai iaka jingrwai kaba sngewtynnad bad kaba la pynlong syndon iaki nongbishar ban pynphong pang shngiat ia katei ka samla kum ka Nongjop jong ka Ribhoi Superstar Season 3 bad ka la ioh rah syndon iaka song pisa kaba 25 hajar tyngka.
Ha katei ka sngi khatduh jong ka Ribhoi Superstar Season 3 lane ka Grand Finale la wan ban ia sakhi lang da u Deputy Commissioner ka Ribhoi u Abhilash Baranwal, U Jayanta Mudoi Branch Manager ka HDFC Bank Nongpoh, U Bah Lansius Syiemlieh CEO LS Syiemlieh Production lem bad kiwei kiwei ki ba la wan ban ai jingkyrshan ia katei ka program.
Sa Peit Ruh