Kawei ka nongshna phlim na ka jylla Assam, ka Rima Das ka la shah khot sngewbha ban leit sha ka Academy of Motion Picture Arts and Sciences, ka seng kaba pyniaid bad khmih ia ka khusnam Oscar jong ka pyrthei.
Katei ka Oscar Academy ha ka 25 tarik jong u bnai Jylliew, 2024 ka la pyntip bad ka khot sngewbha ruh ia kumba 487 ngut kiwei pat ki ‘riewdonsap ban shna phlim kaba kynthup ruh bad kiwei de na kylleng jong ka pyrthei ban long kum ki dkhot.
Lyngba kane ka jingshah khot sngewbha, ka Rima Das ka ioh ia ka kabu ban iaryngkat kyrdan lang bad kiwei kiwei de ki khlur ba pawnam jongka ri India, kum u nongshna phlim SS Rajamouli, u cinematographer Ravi Varman, ka puron Shabana Azmi, u Director Anand Kumar Tucker, ki nongsaindur ia ki jainphong kum ka Sheetal Sharma bad ka Rama Rajamouli bad kiwei kiwei de.
Katei ka nongshna phlim na ka jylla Assam ka la pynpaw ia ka jingaikhublei kaba kyrpang ia ka Oscar Academy of Motion Picture Arts and Sciences bad ong ruh ba ka dap da ka mynsiem jong ka jingsngewtynnad ban ioh rakhe ia ka rukom shna phlim kaba lah ban pynshoh jadu ia ki nongpeit kai.
Kumban shu kdew, ka Rima Das kadei kaba paw pyrthei lyngba ki phlim ki phlim kiba ka la shna kum ka Bulbul Can Sing, ka Tora’s Husband bad ka Village Rockstars. Ka phlim Village Rockstars jong ka, kadei kaba la ioh ban rung ha ka thup jong ka Oscars ha kyrdan Best Foreign Language Film, bad kaba dei tang maka na ka ri India ban ioh ruh ha katei ka thup.
