Ka National Cadet Corps (NCC), kawei naki tnad kaba ju leh shibun ki kam ba bha sha ka imlang ka sahlang kala pynlait paidbah bad sdang ïa kawei pat ka thong bala tip kum ka Yuva Bhagidari haka jingïatreilang bad ka St. Anthony’s College Shillong, ban tehlakam ïaka jingjyllei jong u drok bad kiwei ki jingdih buaid haka imlang ka sahlang.
Ïa katei ka Yuva Bahgidari jong ka NCC la pynlait paidbah ruh hynnin ka 26 tarik Jylliew, 2024 kaba dei ruh ka International Day Against Drug Abuse ne ka sngi pyrshah drok ban sa lam khmat ïa katei ka jingeh ha kaba ïadei bad u drok da ka jingkyrshan lang jong ka NCC Directorate North Eastern Region.
Lyngba katei ka Yuvi Bhagidari, ka jingïakhun bad ka jingpyrshang ban pynsngewthuh sha ki paidbah halor ka jingma u drok kam dei tang ki dkhot jong ka NCC hynrei ki khynnah naki skul bapher bapher kin wan ban snohkti lang ban pynsaphriang ïaka khubor ka jingma u drok bad ki jingdih buaid bad kumno ban ïada bad ban kiar ïalade na kitei ki jingmlien ba sinew.
Ka thong jong katei ka Yuvi Bhagidari ha don haki 3 bynta, kaba nyngkong ka dei ka jingai jinghikai ne ka Training Phase ha kaba ki NCC bala shah jied na St. Anthonys College Shillong ki hap ban pyntbit bad shah hikai ïalade lyngba ka prokram ai jinghikai haka jingïatreilang bad ka Directorate of Social Welfare, Meghalaya Aids Control Society, ki bor pulit ka jylla, KRIPA bad BIDS khnang ba kin ioh ïaka jingtip kumno ban tehlakam bad ban ïakhun ïa u drok, ban pynlong ïaka imlang ka sahlang kaba lait na u drok bad ki kam sniew namar ki khun samla ki don ka bynta ba khraw ban tei ïaka imlang ka sahlang kaba khlaiñ.
Kaba ar ka dei ka jingïalap ne ka Campaign Phase ha kaba kitei ki dkhot ka NCC kin lamkhmat ban pynlong ka jingïalap hapoh ka jaka pule jong ki ban ïakren bad ki samla pule ha kaba ïadei bad ka jingkiew jong ki nongdih drok bad ban ai jinghikai ïaki.
Kaba lai ka long ban pynsahphriang sha ka imlang ka sahlang ne Community Outreach ha kaba kitei ki dkhot ka NCC bala shah hikai kin leit sha ki skul ne ki shnong bapher bapher ha nongbah Shillong ban rah ïaka khubor ban ong em ïa u drok bad ban shim ki lad ki lynti ba ki khun samla kim dei ban ngop ha utei u jait jingdih buaid.
