Shillong, May 25: Ka long shisha ka jingsarong ia ka jylla Meghalaya, ha kaba na ki kam pynneh pysnah mariang u Bah Hally War kum u riew rangbah u la ioh pdiang syndon ia ka khusnam ba la itp kum ka Padma Shri Award na ka President ka Ri India ka Droupadi Murmu.
Kane ka jingioh pdiang utei u rangbah ia katei ka khusnam, ka dei kam kaba u la sumar ne pynneh pynsah ia ka jingkieng jri ba la bna nam bha ha ka jylla Meghalaya bad ba la tip ruh ha ka ktien nongwei kum ka ‘Living Root Bridges’
Ia kane ka khusnam la sam ha ka jingialang kaba la long long mynta ka sngi ha Rashtrapati Bhavan ha Nongbah Delhi bad ki don ruh kiwei kiwei ki nongioh pdiang khusnam na kylleng ka ri ba la ioh ia ka jingithuh halor ki kam ba radbah ba ki la shakri ha ki bynta bapher bapher ha ka ri.
Kum ban pynkynmaw, u Bah Hally War u dei na ka Shnong Siej ba hap ha East Khasi Hills ha kaba kum u riew rangbah u la pynlut por la bun phew snem ban pynneh pynsah ia katei ka jingkieng Jri bad ruh ban pyndonkam da ki buit tynrai ha kaba tei ia katei ka jingkieng jri.
Lah ruh ban ong, ba kane ka Jingkieng Jri ba la sumar bad pynneh pynsah da u Bah Hally War ka dei kaba la paw pyrthei ym tang ha ka ri bad ha ka pyrthei hi baroh kawei, ba bun ki nongjngohkai pyrthei ki wan ban sakhi ia kane ka jingkieng jri kaba don ha ka jylla Meghalaya.
Shuh shuh, kane ka jingioh pdiang u Bah Hally War ia katei ka khusnam Padma Shri Award ka la long shisha ka jingsarong ym tang ia ka jylla Meghalaya bad ka dei ruh kawei na ka bynta kaba khraw bad kaba long ka jingai mynsiem ia kiwei ruh ba kin don ia kata ka mynsiem ban pynneh pynsah ia ka mei mariang.
Sa Peit Ruh