Nongpoh, Jymmang 27: Nalor ki kam sysnhar khadar ïa ki khun ki hajar ba hap hapoh ka Elaka, ka Elaka Nongpoh Sirdarship mynta ka sngi ka la shim sa da ka sien jam ban tei syndon da ka ophis treikam ba pura, ha kaba la sakhi da ka jingbuh mawnongrim ban tei ïa katei ka ophis treikam ba pura ka Elaka Nongpoh Sirdarship ha ka jaka kaba don hajan Laybye Market ha Nongpoh.
Ïa u mawnognrim ban tei ïa katei ka ophis treikam ka Elaka la wan ban plie da u Bah Sosthenes Sohtun MLA ka Jirang bad uba dei u Myntri ka tnad GAD ka sorkar jylla kum u kongsan bad la sakhi lang ruh da ka jingdon lang u MLA ka Nongpoh u Bah Mayral Born Syiem, u MLA ka Umsning u Dr. Celestine Lyngdoh, u Acting Sirdar ka Elaka Nongpoh Sirdarship u Bah Lui Star Lyngdoh, ki Lyngdoh Raid, ki Rangbah Shnong bad kiwei kiwei ki riew rangbah.
Ha kane ka sngi ym tang ba la plie paidbah ïa u mawnongrim ban tei ïa ka ophis treikam, hynrei la pynlait paidbah ruh ïa ka Blue Print na ka bynta ban tei ïa katei ka ophis treikam ka eleka kaba don haduh 3 mala katkum ba la pynkhreh ha ka Blue Print.
Haba ai jingkren ha kane ka sngi, u Bah Sosthenes Sohtun u la ai ka jingïaroh ïa ka Elaka Nongpoh Sirdarship ha kaba ha ka jingïalam u Bah Lui Star Lyngdoh ki la shim ïa kane ka sienjam ban tei ïa katei ka ophis treikam ba pura ka Elaka, kaba long ka jingdonkam ban saindur ne ban tei ïa ka synshar ka khadar kaba khuid bad ruh kiwei kiwei ki kam kiba long ka jingbha na ka bynta ki khun ki hajar.
Halor kine ki kam kiba bha ban sain dur ïa ka synshar ka khadar hapoh ka Elaka, na ka liang u Bah Sosthenes Sohtun u la kular ban ïarap T. 8 lak, u Bah Mayral Born Syiem MLA ka Nongpoh un ïarap T 5 lak bad u Dr. Celestine Lyngdoh un ïarap T. 3 lak na ka bynta ban tei ïa kane ka ophis kaba long hi ka jingdonkam jong ki khun ki hajar bad khamtam ka Elaka Nongpoh ka ban long ka nongsaindur ïa ka synshar ka khadar bad kiwei kiwei ki kam kiba bha ban myntoi ki khun ki hajar.
Sa Peit Ruh