Nongpoh, Jymmang 26: Ka Khasi Students’ Union (KSU), Umran Niangbyrnai Unit hapoh ka jingialam u samla Donald George Nongneng, President bad u samla Augustine Wahlang kum u General Secretary hynnin ka sngi kala pynlong iaka jingkhynra ba kyndit pyrshah ia ki nongtrei bar jylla hapoh ka shnong Umran Niangbyrnai hadien ka jingioh jingtip ba ki don bun ki bar jylla kiba wan trei bylla hapoh ka shnong khlem da don satia iaki kot ki sla kiba biang.
Ha kane ka jingkhynra ka seng, la wan ban iadon ryngkat ruh da ki nongialam ka KSU Umsning Circle bala ialam da u samla Prosper Lyngdoh, Organising Secretary lem bad kiwei kiwei de ki nongkitkam.
Ka seng ha kane ka sngi kala ioh ban beh krad ia kumba 10 ngut ki bar jylla kiba wan trei hapoh ka shnong khlem da son satia iaki kot ki sla kiba biang katkum ki kyndon jong ain bad maham tyngeh ruh iaki ba kim dei shuh ban wan bylla sha ka jylla Meghalaya lada kim don iaki kot ki sla kiba biang.
U samla Donald George Nongneng, President la KSU Umran Niangbyrnai Unit ha kajuh ka por u la maham tyngeh ruh iaki kontraktor kiba ju mlien ban wanrah iaki nongtrei bar jylla khlem ki kot ki sla kiba biang bad ruh khlem da ioh jingbit kaba paka naka shnong.
Shuh shuh, utei u nongialam ka seng ula ong ruh ba ka jingwanrah ia kitei ki nongtrei bar jylla kalong kumba pynshlur iaki mynder ba kin wan ban buhai shnong hapoh ka district bad ka jylla bad kaba ktah jur iaka kamai kajih jong ki paradoh parasnam jong ki trai ri trai muluk haka jylla.
Halor kane ka bynta, utei u nongialam ka seng u la ong ba ka seng kan iai bteng ban peitngor bad peit pyrman bha bad ban iai pynlong ruh iaka jingkhynra pyrshah ia kino kino ki mynder kiba wan trei beain na ka bynta ka jingshngain bad ka shongsuk shongsain ki paidbah trai shnong ka jylla.
Sa Peit Ruh
