Nongpoh, Jymmang 29: U Myntri ka Sorkar Pdeng uba khmih ïa ka Tnad Labour and Employment bad ka Tnad Sports, u Dr. Mansukh Mandaviya, mynta ka sngi u la wanpoi ha jylla Meghalaya ha kaba ki nongïalam na ka jylla ki la leit ban pdiang burom ïa u ha kad liengsuin Umroi ha Ri Bhoi District.

Na ka liang ka Sorkar Jylla, u Bah Wailadmiki Shylla uba dei u Myntri ba peit ïa ki kam jingïalehkai sports, u la mihkhmat ban pdiang ïa u Myntri ka Sorkar Pdeng ha kane ka jingwan jingïuhkjat jong u sha jylla Meghalaya.

Ha kajuh ka sngi, ka BJP Umroi Mandal (Block) Committee ka la pynlong ïa ka jingpdiang burom ïa u Dr. Mansukh Mandaviya bad ka la aiti ruh ïa ka dorkhas halor ki jingeh kiba ïadei bad ka jingïoh tulop jong ki nongtrei contractual kiba trei hapoh ki ophis jong ka Sorkar Pdeng.

Sa Pule Ruh | Ngan Long Ka Sur U Paidbah Ym Tang Sha Ka Sorkar, Ka Majai Kan Long Ka Jaka Khaïi Ba Heh Ha Khappud: Dr. Nonglait

Haba kren sha ki lad pathai khubor, u Bah Bandari Ryntathiang, President ka BJP Umroi Mandal, ha ka jingdonlang u Bah Sen Thabah, President ka BJP Ri Bhoi District bad ST Morcha Secretary BJP Ri Bhoi District, u la ong ba kum ki dkhot ka BJP ki don ka jingkitkhlieh ban shakri ïa ka dong bad ka thaiñ.

U la ïathuh ruh ba ka BJP Umroi Mandal ka la pynsngew sha u Myntri halor ka jingdonkam ban pynbeit ïa ka jingïoh jingsiew jong ki nongtrei contractual kiba trei hapoh ka Labour Department ha ki ophis jong ka Sorkar Pdeng namar kumba long mynta bun na ki nongtrei wages ki dang ïoh iaka jingsiew katkum ka state wages.

Katkum ka jingong jong u, ka BJP Umroi Mandal ka dawa ba ki nongtrei contractual dei ban ïoh ïa ka jingsiew katkum ka Central Wages bad ruh ba dei ban don ki bynta kyrpang lane special recruitment na ka bynta ki trai shnong bad ki trai jylla haba thungkam hapoh ki tnad treikam bapher bapher jong ka Sorkar Pdeng.

Sa Peit Ruh