Margao, Jylliew 01: Ka Sanfida Nongrum, ka thei ialehkai na Meghalaya bad kaba la ioh ban mihkhmat ia ka India ha ka SAFF Women’s Championship 2026, ka la ioh ban khur ia ka nam kum ka thei ialehkai ba tbit, ha ka jingiakhun hapdeng ka India pyrshah ia ka Bangladesh, kaba la pynlong ia ka India ba kan pynliem noh ia ka Bangladesh da 3-0 bad ban pynthikna syndon ia ka kynhun ialehkai ka India ban rung sha ka Semi-Final ha katei ka lympung ialehkai.
Ha ka jingiakhun kaba hynnin ka sngi u Blei bad kaba la long ha Pandit Jawaharlal Nehru Stadium, Margao ha Goa, ka kynhun ki thei ialehkai ka India, ki la lah ban nion tyngeh ia ki thei ialehkai ka Bangladesh, ha kaba tang ha ka kylla step, ka India ka la lah ban lamkhmat ia ka jingiakhun lyngba ka shikol kaba la thep da ka Priya Xaxa ha ka minit ba 36 jong ka kylla step.
Haba bteng ka kylla, ki thei ialehkai ka India ki la lah ban lehbha shuh shuh bad katba ka jingiakhun ka dang iaid shakhmat, ka India ka la ioh biang ba thep kol, ia kaba la thep da ka Lynda Kom, kaba la thep ha ka dur ka Penalty, nangta bud sa ka kol na ka Malavika, kaba la thep ha ki minit shwa ban kut ka jingiakhun.
Lyngba ka namjop kaba hynnin ka sngi, ka kynhun ialehkai phutbol ka India, ki la pynthikna ialade ban rung sha ka Semi-Final ha katei ka SAFF Women’s Championship 2026.
Ka Sanfida Nongrum, ka la ioh ban pdiang ia katei ka khusnam ‘Player of the Match’ ne ka thei ialehkai ba tbit ha katei ka jingiakhun, ka dei namar ba ka la lah ban lehkai bha bad ban tehlakam ia ka jingiakhun bad khamtam eh ha ki bynta ba shapdeng madan bad ka dei ruh ka nongai bol sha kitei ki thei kiba la ioh ban thep kol ha katei ka jingiakhun.
Sa peit ruh
