Budapest, 30 Jymmang: Ka kynhun ialehkai ka PSG ka la ioh ban khur biang ia ka nam lahduh ha ka Champions League 2026, hadien ba ka la lah ban pynliem noh ia ka Arsenal da 4-3, ha ka jingiakhun kaba la poi sha ka jingiashut Tie Breaker, namar ka jingiakhun ha madan, haduh ba kut ki 90 minit bad ka Extra Time, ka jingiakhun ka la kut ha ka jingiakhaid kaba 1-1.
Ka jingiakhun phainal jong ka Champions League 2026, ka dei kaba la long ha Puskas Arena Stadium ha Nongbah Budapest jong ka ri Hungary, ha kaba kitei ki kynhun ki la iakhun, na bynta ban rah ia ka nam kum ka Klob kaba lahduh hapdeng jong baroh ki Klob kiba don ha Europe.
Ha ka jingiakhun kaba hynnin ka miet, ka Arsenal ka la ioh nyngkong ban pynkhih jar lyngba ka kol kaba la thep da u Kai Harvertz ha ka minit ba 5 jong ka kylla step bad katei ka shikol ka la neh haduh ba kut ka kylla step.
Haba bteng ka kylla miet, ki rangialehkai ka PSG ki la nion tyngeh ia ki rangialehkai ka Arsenal bad ha kaba kum katei ka jingiakhun, ka PSG ka la ioh ban pynphai kylla ia katei ka shikol, lyngba u Ousmane Dembele, uba la ioh ban thep ha ka minit ba 64 bad kaba la pyniakhaid ia ka jingiakhun bad ka jingiakhaid ka la neh haduh ba kut ki 90 minit.
Haba la rah sha ka Extra Time, ka jingiakhun ka la kut ha ka jingiakhaid, kaba la pynlong ban rah noh sha ka Tie Breaker bad dei ha ka Tie Breaker, ba ka PSG ka la lah ban pynliem noh ia ka Arsenal da 4-3 bad long syndon kum ka lahduh ha ka Champions League 2026,.
Lyngba ka nam lahduh ha ka Champions League 2026, ka PSG ka la bteng ban long kum ka lahduh ha ka Champions League, namar ha ka Champions League 2025, ka PSG ka la long kum ka lahduh, hadien ba ka la lah ban pynliem ha ka phainal pyrshah ia ka Inter Milan da 5-0.
Sa Peit Ruh
