Nongpoh, Jylliew 2: Ka shnong Mawlyndep ha Ri Bhoi District ka la ioh ia ka jingkyrkhu kaba khraw ha ka roi ka par hadien ba mynta ka sngi ba ar la plie paidbah ïa ka Community Biofloc Fish Farming Unit bad bun tylli kiwei pat ki projek hapoh ka Saansad Adarsh Gram Yojana (SAGY)-II. Ia kane ka shnong la shimti da u MP Rajya Sabha Dr. W.R. Kharlukhi ban peit kyrpang ïak kam pynroi kaba hap hapoh ka Umsning C&RD Block.
Kine ki projek kiba la plie paidbah ki kynthup ia ki Community Biofloc Fish Farming Unit, ki surok shnong, ka zonal reservoir bad kiwei pat ki projek kiba la pyntreikam lyngba ki convergence schemes bapher bapher, kiba thmu ban kyntiew ia ka ioh ka kot bad ka jingim jong ki nongshong shnong.
Ka SAGY ka dei ka prokram ba la sdang da u Myntri Rangbahduh ka Ri India, u Narendra Modi, ban pynlong ia ki shnong ba la jied kyrpang kum ki nuksa haka liang ka roi ka par.
Kawei na ki bynta ba kongsan tam jong kane ka prokram ka dei ka jingplie ïaka Community Biofloc Fish Farming Unit, kaba don 15 tylli ki Unit kiba la tei ha ka jinglut kaba kot sha ka T. 1.12 klur, lyngba ka Meghalaya State Aquaculture Mission 2.0, da ka jingkyrshan jong ka DRDA Ri Bhoi District bad ka Power Grid Corporation of India. Kane ka projek ka lah ban pynmih haduh 20,000 kilo ka dohkha ha kawei ka cycle, bad lah ban pyniaid ar sien ha ka shi snem. La khmih lynti ba kane ka projek kan ai ka jingmyntoi kaba khraw bad kan pynkhlain ia ka kamai kajih jong ki nongrep bad ki nongri dohkha ha ka thaiñ.
Ha kane ka prokram, u Dr. W.R. Kharlukhi, MP Rajya Sabha, u la long kum u Kongsan, katba u Dr. Celestine Lyngdoh, MLA ka Umsning Constituency, u la long kum u Symbud Kongsan.
Kiwei kiba la donlang ha kane ka sngi ki kynthup ia u Raja Brahma, Project Director ka DRDA bad Nodal Officer ka SAGY, u Bah A. Myrthong, BDO ka Umsning C&RD Block, ka Meda Aihun Khongjliw, Superintendent of Fisheries, Ri Bhoi District, ryngkat bad ki nongialam shnong, ki ophisar sorkar bad ki paidbah nongshong shnong.
Sa Peit Ruh