Uwei u briew u la duh iala ka jingim, katba hynriew ngut kiwei pat kila mynsaw hadien ba shibynta jong ka tnum jong ka kad liengsuin ka Indira Gandhi International Airport, Terminal -1 ka la hap kynsan hynne ka step hadien ka jingther jong u ‘lapbah uba jur.
Katkum ka tyllong khubor ba la ioh lum, la iathuh ba baroh ki liengsuin kiba thmu ban her tad haduh ka por 2 baje janmiet, la pynsangeh noh bad na ka liang u myntri ka sorkar kmie ba dei khmih ia ka tnad Civil Aviation, u Ram Mohan Naidu Kinjarapu, u la leit ban jurip hi dalade halor katei ka jingjia.
Ki bor pyniaid jong katei ka kad liengsuin, ki la iathuh ba ki tin kiba sop ia shibynta jong ka katei ka kad liengsuin lem bad ki nar kiba kyrshan, ki la kyllon bad pynjulor ia kumba saw tylli ki kali kiba la pynieng ha ka jaka ban pynhiar bad pynrung briew jong katei ka Terminal -1.
Hadien ka jingjurip, u Ram Mohan Naidu Kinjarapu u la iathuh ba ki liengsuin kiba dei ban her na ka Terminal -1 la pynkynriah noh ba kin her lyngba ka Terminal -2 bad ka Termina-3 jong katei ka kad liengsuin kaba heh jong ka nongbah Delhi.
Utei u myntri jong ka sorkar kmie, u la pyntip ruh ba kane ka jingjia kadei kaba la itriem bad pynbna ruh ba ka sorkar kan ai bai buria haduh T. 20 lak sha ki bahaing jong u rangbah uba la khlad noh ha katei ka jingjia, katba ia kiba mynsaw, ka sorkar kan ai bai buria kumba T. 3 lak marwei.
