Ha kawei ka jingjia aksiden kaba la jia hynnin ka miet ha ka shnong 12 mer ba hap ha ka surokbah National Highway-6 kumba ha ka 9.10 baje ei ei, uwei u briew u la khlad na ka jingmynsaw jur, kaba dei hadien ba kawei ka Trok ka la tynrah ha ka por ba u dang iaid lynti ha kane ka jaka.
Kumba la sakhi da ki briew kiba iohi ia kane ka jingjia, la ong ba kane ka Trok kaba thylli kaba don ia u Number AS 01 KC 9051, katba ka dang mih na kawei ka Kudam Cement ban kiew sha Shillong ka la tynrah kynsan ia utei u briew katba u dang iaid lynti haduh ba u la mynsaw jur.
Une u ba la mynsaw la tip kyrteng kum u Higlusbor Momin, 45 snem ka rta, uba shong basah ha Ampher, 12 mer bad ha kane ka jingjia la rah noh ia u mar mar sha Byrniat PHC ban ioh ia ka jingsumar, hynrei haba la poi ha katei ka jaka ai jingsumar ki Doctor ki la pynbna ba u la dep ban khlad noh na ka daw ka jingmynsaw jur, ha kaba hadien la rah noh ia ka met jong u sha Civil Hospital Nongpoh ban pyndep ia ka postmortem examination.
Halor kane ka jingjia, la ong ruh ba u Dirbar katei ka trok ba la tip kyrteng kum u Thomlang Phawa, 33 snem ka rta, naka shnong Mookyndur, West Jaintia Hills, u la wan ban aiti noh hi da lade hakhmat ki Pulit ka Byrnihat Police Outpost bad ka jingtohkit halor kane ka jingjia ki pulit ki dang pynlong ia ka jingtohkit kaba bniah.
