Nongpoh, Jylliew 24: Ka District Commerce and Industries Centre (DCIC), Ri Bhoi mynta ka sngi ka la pynlong ïa ka Capacity Building Workshop halor ka skhim UNNATI 2024 (Uttar Poorva Transformative Industrialization Scheme) na ka bynta ki nongbei pisa bad ki nongseng kam seng jam kiba don ha Ri Bhoi District, ban ai jingtip kaba bñiah shaphang kane ka skhim bad ki kyndon treikam jong ka.
Ha kane ka workshop la sakhi ïa ka jingdonlang u Bah C. Lyngdoh, Deputy Director ka tnad Planning, u G.F.W. Pariat, General Manager ka DCIC Ri Bhoi, ryngkat bad ki ophisar na ka Department for Promotion of Industry and Internal Trade (DPIIT), New Delhi, kiba la ai jingpynshai halor ka skhim bad ki lad jingïarap ba la pynkhreh da ka sorkar pdeng. La donlang ruh ki nongbei pisa bad ki nongseng kam seng jam na kylleng ki bynta jong ka distrik kiba la wan ban shim bynta ha kane ka prokram.
Ka UNNATI ka dei kawei na ki skhim ba kongsan jong ka sorkar pdeng kaba thmu ban kyntiew ïa ka roi ka par ha ka liang ka karkhana, ban khring ïa ki nongbei pisa bad ban thaw ïa ki lad ïohkam ïohjam ha Meghalaya bad ha ki jylla ka thaiñ Shatei Lam Mihngi. Ka skhim ka ai ruh ïa bun jait ki jingïarap pisa kum ki subsidy, jingïarap ha ka sut ram bad ki jingmyntoi kiba ïadei bad ka GST bad kiwei kiwei.
Haba kren ha kane ka sngi, u C. Lyngdoh u la ong ba ki samla bad ki nongbei pisa jong ka jylla ki don ïa ka sap kaba kyrpang, bad kane ka skhim ka long ka lad kaba biang tam ban pynkylla ïa ki na ki nongwad kam sha ki nongthaw bad ai kam. U la ong ruh ba kane ka plie lad ïa ki paidbah ban seng ïa ki jait kam lajong kiba pher ba pher kiba lah ban kyntiew ïa ka ïoh ka kot.
U la pynpaw ruh ba ka jingthmu ba kongsan jong kane ka workshop ka long ban thaw ïa ka rynsan na ka bynta ki nongbei pisa bad ki nongseng kam seng jam ba kin ïoh jingtip kaba bñiah bad kaba shai halor ki rukom treikam, ki kyndon bad ki jingmyntoi jong ka skhim.
Ha katei ka workshop kala don ruh ka jingïakren bad jingïatai hapdeng ki nongshim bynta bad ki ophisar, ha kaba la jubab ïa ki jingkylli bapher bapher bad ai jingpynshai halor ki lad jingïarap kiba don hapoh ka skhim na ka bynta ban kyntiew ïa ka kam seng kam seng jam bad ka roi ka par ha ka them Ri Bhoi District.
Sa peit ruh
