Khliehriat, Jylliew 24:Hadien 23 sngi ka jingshah thngan u Bah Marshall SB Biam kum u President ka Jaintia Coal Owners, Miners, Suppliers and Workers Association (JCOMSWA) ha ha East Jaintia Hills ban dawa ïa ka sorkar na ka bynta ban ailad noh ban tih dewiong ha rilum Jaintia, hynrei hynnin ka sngi na ka liang u tei u nongïalam u la pynbna ba u la sangeh shwa ïa kane ka jingshah thngan bad ka seng kan sa shim pat sa da kiwei ki sienjam kiba kham tyngeh.
Haba kren sha ki lad pathai khubor, u Bah Marshall SB Biam kum u President katei ka seng bad uba la shah thngan ban dawa tih dewiong ha rilum Jaintia, u la ong ba kane ka jingshah thnga la sangeh shuwa, namar ki don ki dkhot kiba ïa shah thngan lang tang hadeng ki shi sngi bad ar sngi ki la kiew ka BP bad kiew shini bad ha kawei ka bynta u ïaroh ïa ka jingshlur jongki ba kane ka jingshah thngan ka dei tang ka jingsdang bad ha ki khyndiat por kin shim sa da ki lad kiba kham tyngeh ban mih sha surok na ka bynta ban dawa ïa ka hok ki paidbah ban ioh tih dewiong noh ha rilum Jaintia.
U la ïathuh ruh ha kine ki jingshah thnggan ka sorkar ka la khot ïa ki nongïalam ka Association ban ïa kynduh ïa u Chief Secretary ka Meghalaya bad 4 ngut ki dkhot ki la shah thung kum ki dkhot na ka bynta ban ïa thaw lang ïa kata ka Mining Plan bad ka sorkar ka la buh ruh da ki skhim kyrpang ïa kito ki longïing kiba shah ktah na ka jingkhang tih dewiong.
U la ong ruh kam shym mut tang ba la sangeh kane ka jingshah thngan ba ka seng kan shong kli kti noh, hynrei na ka liang ki nongïalam ka seng kin dang bud dien ban ïa kren sha Secretariat bad ruh ban dang wad bniah na ka ophis u Deputy Commissioner ba ka seng kan sa pyntip ruh sha ki paidbah lyngba ki lad pathai khubor.
Halor ki jingsngew ki ki paidbah ba la sangeh ïa kane ka jingshah thngan, u Bah Marshal SB Biam u la ong ba ki paidbah ki don ïa ka hok ban pynpaw ïa ka jinsngew jongki, namar u paidbah ruh u don ka bor kaba khraw halor kane ka kam bad wat la katta ruh u buh ka jingkyrpad ïa ki nongkyrshan ba kin dang bteng ka jingkyrshan ba kum ka seng ruh kan nym shong kli kti ba kan dang bteng ban shim da kiwei ki sienjam tad haduh ba ka sorkar kan ailad biang ban tih dewiong ba ka jingkhang ban tih dewiong ka la ktah shi shisha ïa ka kam ka jam, ka kamai ka kajih bad ka ioh ka kot ki paidbah ha ri lum Jaintia, u la bynrap.
Peit ruh:
