Shillong, Jylliew 27: Haba pan ka jingkyrshan na ki paidbah ka thain Mawkriah mynta ka janmiet ha ka jingialap election na ka bynta ka election MP shiteng samoi na Shillong Parliamentary Constituency, u kyrtong ka NPP u Dr. DRL Nonglait u la ong ba ngi donkam ia ka sorkar kaba skhem bad ba kaba khlain ban lah ban pynurlong ia ka jingdonkam jong u paidbah.
U la ong ruh ba u rung sha ka jylli sain pyrthei ka dei ka jingangnud ban kyntiew, ban wan rah jingkylla bad ban pynshai sha u paidbah halor ki rukom treikam bad ban lah ban pynurlong ia ka jingdonkam u paidbah donkam pat ia kata ka sokar kaba skhem bad kaba khlain.
U la ong ruh ngim da donkam than ban ia mih paidbah ne iarah lama ban pyrshah sorkar, hynrei donkam ruh ban don ka jingiatrei lang ban wan rah ia shibun ki jingkylla hapoh ka jylla, namar man la ki shnong ki donkam ia ki kam pynroi bad lada ngim don kata ka sorkar kaba skhem bad kaba khlain kan shem jingeh ban pynurlong ia ka jingdonkam u paidbah.
Shuh shuh, u la bynrap ruh da kaba kyntu ia ki paidbah ba ngi dei ban kiar noh ia kata ka mynsiem jong ka jingiashun ia pen bad ngin ia map noh lada don ka jingbakla ha ki election ba la dep, namar ban trei na ka bynta ka jingmyntoi ki paidbah donkam ban trei da ka mynsiem jong ka jingiaieit bad ka jingiatrei lang ha baroh ki liang.
Kumba la sakhi ruh ha kane ka jingialap election u Dr. DRL Nonglait ha Mawkriah, da ki spah ngut ki paidbah ki la wan ban sngap ia ki Nongrim ialap election jong une u kyrtong ka NPP bad kawei kaba u la ban khia ka long ba um kwah ban ia kawang ktieh ne iashun iano iano, hynrei kaei kaba u angnud kumba u la rung sha kane ka seng sain pyrthei ka long ban pyndep ia ka kamram ban shakri hok ia u paidbah lada ki paidbah ki pynjop don burom ia u ha kane ka election MP shiteng samoi na Shillong Parliamentary Constituency.
Sa peit ruh
