Sa shisien biang, ki paidbah ka Mawryngkneng Constituency ki la kmen bad hun mynsiem, hadien ba u MLA ka thain, u bah Heaving Stone Kharpran ha ka 27 tarik Jylliew 2026, u la ioh ban sam biang ia ka MLA Scheme ha ka sien kaba ar kaba la pynlong ha phyllaw jong ka iingsah jong u MLA kaba don ha Mawlynrei.
Ha kane ka sngi la wan ban sakhi lang da u MDC ka thain, u bah Bill Clinton Wankhar, u Secretary ka By Election Committee jong ka VPP, u bah F. Kharpran, nangta kiwei pat ki nongkikam jong ka party, ki nongiarap jong ka party, ki longkmie, ki rangbah bad ki samla.
Kine ki scheme kiba la sam sha ki paidbah ha ka sien kaba ar lane ka 2nd Installment ki kynthup ia ki kor suhjain, ki scheme shimet, ki scheme ri jingri, ki scheme rep, ki scheme misteri bad kiwei kiwei kiba baroh kiba ioh jingmyntoi ki long 412 ngut bad ryngkat ka jiongioh jingmyntoi ki skul, ki dorbar hall shnong, bad kiwei pat ki jingdonkam ki la kot ha ka jinglut kaba 1,52,21,000 tyngka tang ha ka 2nd installment.
Na ka liang u MDC ka thain haba ai jingkren, u la iaroh ia ka jinglah jong u MLA ka thain ba watla ki don ha ka liang pyrshah, khlem da khein ia ka jingiapher, u la wanrah ia kiba bun ki scheme pynroi ha ka thain la ki dei ki scheme sorkar jylla lane ka scheme sorkar kmie.
U MLA haba ai jingkren u la batai shai bin pa bin ia ki jinglut ha kaba iadei bad kane ka jingsam ia ki MLA scheme kaba la pynhun ia ki paidbah kiba sngap bad shah shkor ia kane ka jingpynshai.
U MLA u la ong ba watla bun kiba la kynthoh ia u ha ki rynsan social media ba u leh shiliang bad u peit briew, hynrei kum u kpa ka constituency, u trei na ka bynta ka jingbha jong baroh bad watla ka constituency kadei kaba heh tam ha baroh kawei ka jylla bad ka Ri, u hap ban peit ba baroh ki dei ban ioh katjuh kumba dei ban ioh.
Sa peit ruh
