Nongpoh, Jylliew 30: Ha ka jingialang ban pynskhem ia ki nongkitkam ba thymmai ka NPP Nongpoh Block bad kaba la long mynta ka sngi ha Sajer Nongpoh, ki la don ki katto katne ngut ki nongkitkam na ka UDP bad Congress, kiba la wan ban pyniasoh noh ialade sha ka NPP bad ia kaba la pdiang sngewbha ia ki da ki heh nongialam ka NPP.
Ha katei ka jingialang ban pynskhem ia kitei ki nongialam ba thymmai ka NPP Nongpoh Block Executive Committee, kaba kynthup ia ki nongkitkam ka NPYF Nongpoh Block bad NPWF Nongpoh Block, la sakhi da ka jingdon u Bah Hamletson Dohling, Working President ka NPP ha ka jylla, nangta u Dr. Celestine Lyngdoh, MLA Umsning bad uba dei u nongaiktien ka NPP, ka Kong Rona Khymdeit, MDC Nongpoh, u Bah Clement Mawlong, President ka NPP ha Ri Bhoi, u Bah Pynbhalang Syiem, President NPYF ha Ri Bhoi lem bad shibun kiwei pat ki nongialam ka NPP.
Kitei ki nongkitkam ka NPP Nongpoh Block Executive Committee, kiba la shah pynskhem ha katei ka sngi, ki kynthup ia ka Kong Rona Khymdeit kum u President, u Bah Celestine Syngkli kum u General Secretary, u Bah Henry Nongrum, kum u Senior Working President, u Bah Rayonald Kharkamni kum u Working President lem bad kiwei ki nongkitkam ba hakhmat.
Ki nongai jingkren ha katei ka sngi, kaba kynthup naduh u Bah Hamletson Dohling, nangta u Dr. Celestine Lyngdoh lem bad kiwei, ki la pynpaw ia ka jingkmen haba iohi ia ka jingiatylli ki para nongkitkam ka NPP Nongpoh Block bad kiba la ong ruh, ba katba nangmih ki sngi ki por, bun ki paidbah kiba la phaikhmat sha ka NPP, kata ka dei namar ba ki la iohi ia ka jingtrei bha da ka Party NPP.
Ki la kyntu ruh ia ki nongkitkam ka NPP, ba ki dang bteng ban trei shitom bad ban pynneh ia ka jingiatylli ha Nongpoh Block, ban pynjop ia u Dr. DRL Nonglait, Kyrtong ka NPP ha kane ka Ilekshon MP Shiteng Samoi bad khamtam eh na bynta ban pynkhreh ia ka Ilekshon MLA ha u snem 2028.
Peit ruh:
