Nongpoh, Jylliew 30: Ka Khasi Students Union Central Executive Council lem bad ka KSU North Khasi Hills District Unit mynta ka sngi ki la leit syndon ban pynsangeh ia ka jingtei jong ka Food Court ha Umling, kaba dei ka jaka ban tei ia ka Facilitation Centre ban peitngor ia ki briew kiba rung ne mih sha kane ka jylla.
Shwa ban leit khang ia katei ka jingtei jong ka Food Court kaba la iaid shaphrang ha Umling, ki nongialam ka KSU ki la leit shwa ban ia kynduh ia u Tourist Officer ka Ri Bhoi u bah Bansynshar Nongkynrih ban pan jingshai halor katei ka jingtei bad dei hadien ka jingkynduh ia utei u Tourist Officer ki la hiar ban leit jurip sha Umling ba pynsangeh mardor ia katei ka jingtei jong ka Food Court ba kum ka seng ka pyrshah ba ha ka jaka ban tei ia ka Facilitation Centre la tei pynban da katei ka Food Court.
Ha kane jinglei kynduh ia u Tourist Officer ka Ri Bhoi la ialam da u Vice president ka KSU Central Executive Council u Samla Pynkmen Sanmiet bad u President ka KSU North Khasi Hills District Unit u Samla Ferdynald Kharkamni bad la synran lang da u Sport Secretary ka KSU Central Executive Council u Samla Erick Nongkynrieh, u General Secretary ka KSU North Khasi Hills District Unit u Samla James Hitler Mawphniang lem bad kiwei kiwei ki dkhot ka KSU.
Haba kren sha ki lad pathai khubor, u Samla Pynkmen Sanmiet kum u Vice president ka KSU Sengkmie, u la ong ba ka daw kaba la pynlong ia ka seng ban wan kynduh ia u Tourist Officer ka dei halor ka nongrim ban pan jingshai ba ha u snem 2020 la plie ia ka Facilitation Centre ha Umling na ka bynta ban peit pyrman ia ka jingwan rung ki briew kiba na Shabar ka jylla, hynrei kumba la iohi ha ki lad pathai khubor ka sorkar ka tei pynban da ka Food Court ban pynlong pynban kum ka dukan bad kiwei ki jingtei ba ha rukom.
U la ong ruh kaba sngewsih ka long ba naduh u snem 2016 la ia kren bad ka sorkar pass noh ia ka ain MRSSA, bad mynta la dap 10 snem ka sorkar haduh mynta kam pat lah ban treikam ei ei ia kane ka ain bad ruh ban tei ia kita ki Facilitation Centre ha kylla ki jaka jong ka jylla.
“ U Myntri Rangbah ka jylla u la dep kren ruh hapoh ka dorbar thaw ain ba un thaw ia ki lad ki lynti ban pylait pat ia kane ka ain MRSSA na ka Judicial Scrutiny bad na ki Scrutiny ki ain jong ka sorkar India bad ban pynthikna ruh ban pynieng ia kita ki Facilitation Centre ha kylleng ki jaka jong ka jylla, hynrei kumba long mynta ia kane ka jaka ban pynlong kum ka Facilitation Centre la pynkylla pynban sha ka Food Court kaba pynsngewsih ia ka seng bad ia ki paidbah kiba angnud ban don kine ki khyrdop ban peit pyrman ia ki bar jylla” ong u Samla Sanmiet.
Shuh shuh, u la bynrap ruh da kaba ong, ba ka seng kam pyrshah ia ka sorkar ban tei ia ka Food Court ne kiwei kiwei ki jingtrei bad ka dei ban pynthikna shuwa ban tei ia ka Facilitation Centre bad lada kam lah ban tei ia ka Facilitation Centre ka seng ka la rai ban pynsangeh shuwa ia kane ka jingtrei bad shen ka seng kan sa leit ruh ban ia kynduh ia ki bor bahalor ka sorkar ban ia kren halor kane ka phang, u la bynrap.
Peit ruh:
