U General Upendra Dwivedi mynta ka sngi, ka 30 tarik u Jylliew, 2024 u la shimti ban long kum u heh shipai ryngkew ba thymmai jong ka ri India lane uta u Chief of Army Staff hadien ka jingshongthait noh jong u General Manoj C Pande.
Shwa ba un shah pynkiew kyrdan kum u heh shiphai ba hakhlieh duh jong ka ri India, u Upendra Dwivedi u la shakri kum Vice Chief of the Army Staff bad u la shakri kum u heh jong ka tnat shipai jong ka Northern Command ruh kumjuh, kaba peit ïa ka Jammu bad Kashmir bad ka Ladakh nalor ki khappud ba kongsan jong ka India bad ka Pakistan.
Ha ki sawphew snem lynter jong ka jingshakri ha ka kam shipai, u Upendra Dwivedi, u la bat ia ki kyrdan bapher bapher jong ka kynhun shipai (18 Jammu & Kashmir Rifles), brigade (26 Sector Assam Rifles), DIG jong ka Assam Rifles (East), bad 9 Corps jong ka Indian Army. Kum u shipai shipai, u la shakri ruh kum u Director General Infantry bad u General Officer Commanding in Chief jong ka Northern Command.
Kum ban shu kdew, ka sorkar kmie ka la pynbna ia ka jingthung ia u Upendra Dwivedi kum u khlieh duh jong ki shipai ka ri ha ka 11 tarik u Jylliew, 2024. Da ka jingshimti u Dwivedi ia ka kam kum u heh shipai, u Upendra Dwivedi bad u heh shipai duriaw jong ka India u Admiral Dinesh Tripathi kin sa long ki para klas kiba nyngkong eh ban ialam ia la ki jong ki jong ki kam, kata uwei ha ki shipai ryngkew bad uwei pat ha ka liang ki shipai duriaw. Baroh arngut ki la pule ha kajuh ka klas ha ka skul Sainik kaba don ha Rewa jong ka jylla Madhya Pradesh.
