Shillong, Jylliew 30: Tang na ka jingleit sngewlem sha kawei ka ïing iap briew ha ka Shnong Nongdom ba hap ha Eastern West Khasi Hills District, ka la wan rah pynban ka jingjia ba sngewsih, ha kaba haduh 50 ngut ki paidbah la hap ban rah sha Civil Hospital Mairang ban ioh ia ka jingsumar, kaba dei ruh hadien ka jingsuba ba ki la kem pang na ka jingleit bam ia ka bam ha ka ïing iap briew.
Katkum ka tyllong khubor ba la ioh lum, la ong ba kane ka jingjia ka la jia ha ka 28 tarik u Jylliew 2024, ha kaba 10 ngut ha katei ka sngi ki la poi sha Hospital ban shah sumar bad ha ka sngi kaba bud, kata ha ka 29 tarik u Jylliew, 2024, la la ioh lum jingtip biang ba sa 40 ngut ei ei ki paidbah ki la poi shah sumar ha kane ka Civil Hospital Mairang bad kiba bun na kitei kiba kem pang ki dei kiba na ka Shnong Nongdom.
La ioh jingtip ruh, nalor kitei kiba la kem pang bad shah sumar ha Civil Hospital Mairang, la don ruh kiwei kiba la leit ban shah sumar ha kiwei ki jaka ai jingsumar, kaba la suba hi ba ka lah ban dei ka jingkem pang na ka jingbam ia ka bam ha katei ka ïing iap briew.
La ioh lum jingtip ruh, kitei kiba la hap ban shah sumar ha ki jaka ai jingsumar, ki dei kiba la kem pang na ka jingpang prie bad pynhiar bad ruh ka jingpang shit met.
Shuh shuh, halor kane ka jingjia, la ong ba na ka liang ki bor sorkar lyngba u Food Inspector ki la phah ban test ia kitei ki jingbam ba ki la bam ha katei ka ïing iap briew ban tip ia ka jinshisha bad wat la katta ruh la ong ruh ba ym pat lah ban tip ia ka daw ba thikna la ka dei ka jingktah na ka bam ha katei ka ïing iap briew ne ka la ban dei na kiwei ki jingpang, ha kaba ki bor ba dei peit ki dang phah tohkit bniah ia ka bam khnang ban lap ia ka daw ba thikna ka jingkem pang kynsan kitei ki ba la leit sha ka îing iap briew, ong ka tyllong khubor ba la ioh lum da u Meghalayapost.news.
