Nongpoh, Naitung 10: Hadien ba la lap ba ki don ki katto katne jaka pule, ki jaka sah ki khynnah pule lem bad ki dukan, kiba ha don ha ki shnong bapher bapher ha Raid Marwet, Meghalaya bad kiba la pyndonkam da u Pin Code Assam, ki nongialam ka FKJGP Baridua Circle, mynta ka sngi ki la leit ban kynduh ia u BDO Umling Block, na bynta ban jingpyrshah bad kaba long kum ka jingdawa na u ba u dei ban leh eiei, ia kitei ki jaka pule, ki jaka sah ki khynnah pule lem bad ki dukan, kiba pyndonkam da u Pin Code Assam ha ki jaka ba la hap sha Meghalaya.
Ha katei ka sngi ba kitei ki nongialam ka FKJGP Baridua, ki la leit ban kynduh ia u Bah Eric Dkhar, BDO Umling Block, la ialam da u President ka seng u Bah Denis Nongrum, ha ryngkat ka jingdon kiwei pat ki dkhot ka seng.
Haba kren sha ki lad Pathaikhubor hadien ba la dep ban kynduh ia u BDO, na ka liang u Bah Denis Nongrum, u la ong ba na ka liang u BDO um lah ban leh eiei, ha kaba u la bthah ia ki ba ki dei ban leit kynduh ia u ba kin leit kynduh ia u Deputy Commissioner ka Ri Bhoi, khnang ba un ioh ban leh ia kaba donkam.
Shuh shuh, u la ong ba u Pin Code ha thain Raid Marwet u dei 793101, hynrei ki don pat ki jaka pule, ki jaka sah ki khynnah pule lem bad ki dukan, kiba pyndonkam da u Pin Code Assam uba dei 781023, ia kaba kum ka seng ka pyrshah jur bad kiba la dawa ba ki dei ban pyndonkam beit da u Pin Code ka Meghalaya, namar ba ki dei ki shnong kiba dang hap ha Meghalaya.
Namarkata, na ka liang ka seng kan ieng pyrshah beit halor katei ka jingpyndonkam jaka pule, ki jaka sah ki khynnah pule lem bad ki dukan da u Pin Code Assam ha katei ka thain bad kum ka seng, kan sa leit ban kynduh sha ki bor ba halor, khnang ba kitei kiba la pyndonkam Pin Code Assam ba kin pyndonkam noh da u Pin Code Meghalaya, u la bynrap.
Sa peit ruh
