Shillong, Naitung 10: Ki nongshong die jingdie ha madan bad ha ki rud surok kiba don hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) hynne ka step ki la tur paidbah ha khmat ka ophis Shillong Municipal Boards (SMB) ban pyrshah iaka jingthmu ka Sorkar ban pynkynriah lut ia baroh kiba shong die jingdie haki thain Motphran, GS Road, Jail Road bad Khyndai Lad.
Ki nongdie jingdie madan kila dawa naka Ophis SMB ban thaw iaka Town Vending Committee (TVC) ba pura bad ban pynkynriah iaki nongdie madan daka ain, ym tang daka jingmon jong ka Sorkar ne ka Ophis SMB.
Ha ryngkat ki Pla Card kiba thoh ‘Thoh noh daka TVC ba pura’, ‘Bishar bniah halor ki kam jong ki nongdie madan’, ‘Iaid katkum ka ain’, ‘Wat pynduh iaka Iew kaba rim naduh hyndai hynthai’ nalor ka jingpyrta pynrem iaka Ophis SMB bad iaka Sorkar Jylla.
Haba kren shaki lad pathai khubor u Assistant General Secretary ka MGSPHSVA u Bah Shane Thabah u badei ruh u dkhot ka TVC ula ong ba baroh ki tip ba la thaw iaka Provisional Town Vending Committee bad katkum ka ain ka PVTC kala kut noh tang shi snem.
U Bah Shane ula ong ba ka jingwan tur jong ki nongdie madan hakhmat ka ophis SBM kadei ban dawa thaw daka Town Vending Committee (TVC) ba pura ha ryngkat bad ka jingkynnoh ba ka Provisional Town Vending Committee ka treikam katba mon.
Ula kynnoh ba ka PTVC la shu thaw khlem da don kano kano ka ilekshon bad dei namar kane ka PVTC ka treikam bad ka shim rai katba mon khlem da pyrkhat iaka hok ki nongdie madan.
“Namar kane ngi dawa naka Ophis SMB ban peit bniah bad ban thaw noh ia ka TVC ba pura bad ban pyntreikam ruh kat kum ki kyndon jong ka ain” la ong u Bah Shane.
Sa peit ruh
