Nongpoh, Naitung 12: Ka jingbym don lad don lynti shuh na ka jingshlei um kaba la ju jia na ka por sha ka por ka la pynlong iaki Nongshong dukan ban shu sngap noh, namar tang shu wan u lapbah ba jur ki nongshong dukan na ka thain Byrnihat shaduh sha Khanapara ki la rit mynsiem namar ma ba jur slap ki hap ban mad ia ka jingshlei um.
Kane ka jingshlei um ka ktah ym tang iaki nongshong dukan harud ka surokbah National Highway, hynrei ka ktah ruh wat ia ka leit ka wan ki paidbah kumba la ju jia ha Jorobat bad ha kiwei kiwei ki bynta jong ka surokbah kaba pyniasoh ia ka surok Shillong-Guwahati.
Sa pule ruh: Rung NPP ki Congress bad na kiwei ki Party ha ka sngi ialap Ilekshon u Dr. DRL Nonglait ha Iew Mairang
Ki jaka kiba ju mad ia ka jingshlei um ki kynthup naduh Byrnihat, Umpher, Jorobat, Mawsmai, Baridua, Killing haduh Khanapara. Kumba la ju pynpaw da ki paidbah ka daw kaba ki hap ban mad ia ka jingshlei um ka dei namar ka jingrit bad ka jingbym biang ki Nala um ka surokbah National Highway-6 jong ka surok NHAI.Kumba la sakhi mynta ka sngi ruh, hadien ka jingther u lapbah kiba bun ki nongshong dukan ki la shah ktah jur na ka jingshlei um bad tang shu wan u lapbah ba jur ki la hap ban pynkreh ban lum ia ki tiar ki tiar, namar tang shu shlei um ka um ka la rung sha ki dukan bad kaba la pynsohsat ia ki paidbah.
La sakhi ruh mynta ka sngi, hadien ka jingjur slap ym tang ba la don ka jingshlei um kaba la buh jingeh ia ki paidbah ruh ha ka leit ka wan, hynrei la don ruh ka jingtwa khyndew ba ka khyndew ka la ban ia kawei ka Kali kaba ieng harud surok.
Ha kane ka jingshlei um, Ki kali paidbah ruh ki la sahkut bun kynta ha ka surok na Khanapara sha Jorobat ba la jur ka jingshlei um, kaba la pyndap um ia ka surokbah.
Sa peit ruh
