Shillong, Naitung 15: Kiba bun ki nongshong dukan bad wat ki paidbah ha Khyndailad mynta ka sngi ki la her syrngiew bad sheptieng hadien ba la lap ia kawei ka Pla (Trolley Bag) ba la wan buh ha ka jaka paidbah.
Ia katei ka pla la lap ha jan OB Mall kumba ha ka por 11.30 baje mynstep.
Na ka liang ki bor Pulit ka East Khasi Hills ki la wan poi mardor ha katei  ka jaka ba la ker kut ia katei ka jaka ba don pla bad la pynsangeh ruh ia ki Kali bai aid na IGP sha Khyndailad ha kanbab la wan rah ka jingdheng kali ha kane ka Nongbah.
Na ka liang ki Bomb Squad ruh ki la wan poi mardor sha kane ka jaka ban leh katkum ki kyndon bad ban tohkit ia katei ka pla.
Kane ka jingkhih ki paidbah ne ka jingtieng ka la kut noh haduh ka por 12.30 baje mynsngi, hadien ba la wan poi u trai katei ka Pla uba la kam ba ka dei ka pla jong u. U la iathruh ba u la iehnoh ia ka pla katba u dang leit sha MUDA Complex.
Dei hadien ba la dep tohkit la pynlait noh ia ka jingker ha katei ka jaka ba don ka pla bad la ailad biang ban iaid ki Kali. Ym shem la lap kino kino ki mar pynbthei, ha kaba ki Pulit ki la kyrpad ia ki paidbah ba kim dei ban shu iehnoh ia ki tiar ki tar jongki ha ki jaka paidbah khlem da don ba ap.
