Nongpoh, Naitung 21: Ka kong Christable Wanniang General Secretary ka CSWO, Central Body mynta ka sngi kala kynnoh ba kawei ka longkmie haka shnong Lumnongrim Dewlieh ha Ri-Bhoi District kaba la tip kyrteng kum ka Worda Nongbri kala apply ïaka skhim PMAY-G haka kyrteng ki lai ngut ki khunswet katba ïa katei ka iing la shna haka jaka lajong bad la kynnoh ruh ba kitei ki khunswet kim sah shuh bad ka la slem hynrei ki sah noh ha iing ka meiduh namar ka jingkynnoh shah lehbeiñ ha katei ka kong Worda Nongbri kaba dei ka kmie ieid jong ki.
Naka liang ka kong Christable Wanniang hadien ka jingioh jingtip halor katei ka jingshah knieh ka bhah kitei ki khunswet kala hiar sha ka shnong Lumnongrim Dewlieh ban ïakren bad katei ka kong Worda bad kumjuh ruh ban leit jurip ïa katei ka iing kaba la tei lyngba ka skhim PMAY-G kaba ym don ba sah satia namar katei ka kong Worda kala don la ka jong ka iing.
U wei nakitei ki khunswet u la ïathuh ba la slem ba u la mih noh na iing katei ka meiieid kaba dei ka kong Worda da kaba kynnoh ba kadaw ka dei namar ka jingpyntrei shitom bad lehbeiñ ha kaba kim ioh shuh ka pule dangle bad leit sah noh bad la ka meiduh ka kong Bahun Nongbri.
Naka liang ka Kong Rilang Nongbri kaba dei shipara bad ka kong Bahun kaba dei ka meiduh kitei ki khunswet kala ïathuh ba maka ruh kala ioh ïaka skhim PMAY-G ha u snem 2023 hynrei la kynnoh ba katei ka kong Worda Nongbri kala pynïashrut hapdeng jong ki shipara bad kam shym la ioh pdiang ruh ïaka jingsiew haka bynta ba ar jong katei ka skhim, hynrei la ioh ban pyndep da ka jingïarap ka seng CSWO.
Haba kren sha ki lad pathai khubor naka liang ka kong Christable kala ïathuh ba kala lap ïa katei ka kam dei lyngba ka RTI ba kala pan haka 4 tarik Naiwieng 2025, ha kaba katei ka kong Worda kala pan skhim PMAY naka bynta ban ri ïaki lai ngut ki khunswet bad phah jingthoh ruh sha ka shnong haka 15 tarik Rymphang 2021 bad naka liang ka shnong ruh kala dep ban pynshisha bad ka sorkar kala dep ruh ban ai ïaka work order haka 17 tarik Jymmang 2023, ban shna ïa katei ka iing kaba ka sorkar kala dep ban pynlait pisa haki 3 bynta, hynrei kaba sngew lynngoh ka long ba kumno katei ka kong Worda kaba don ruh laka jong ka iing ka sem ka ruh ki karkhana ka ioh ïa katei ka skhim ba duk kaba dei ka bhah jong kitei ki khunswet.
Hadien ka jingtip ba thikna lyngba katei ka RTI la phah jingtip lyngba ka shithi shaka kong Worda ba kadei ban pynshna bujli ïaka iing naka bynta kitei ki khunswet, haka jaka kaba ka kmie ieid trai jong ki kala dep ban ai bhah ïaka jaka, hynrei kam shym la jubab satia bad kumta kala phah shithi sa sha u Rangbah Shnong ban pyntip ïa katei ka kam haka 7 tarik Naitung 2026, hynrei kala kynnoh ba ki ai daw pynban ba ki bunkam.
Kumta naka liang ka kong Christable kala rai ban ïaid pat da kiwei ki lynti sha ki bor bahalor ban pynioh ïaka hok kitei ki khunswet.
Sa peit ruh
https://youtu.be/dWTQn1cTlXU?si=2RmgOQlVKVdoOG3D
