Nongpoh, Naitung 21: Ka long shisha ka jingjia kaba ym lah ban poi pyrkhat bad ym lah ban mut dur satia, halor ka jingjia kaba la jia ha ka shnong Umlamphlang ba hap ha Mawhati Constituency, ha kaba ka kmie ka dang leit kha khyllung sha Ganesh Das Hospital Shillong bad u khun pat u ba dang 7 snem ka rta u ngat pynban ha ka apot ka jingtwa khyndew haduh ba u la duh noh ïa la ka jingim.
Kum ban pynkynmaw, kane ka jingjia ka la jia ha ka 20 tarik u Naitung 2026 ha ka shnong Umlamphlang bad na ka daw ka jingther u lapbah ha ka por 4 baje ei ei mynstep ka la don ka jingtwa ka khyndew kaba la ngat ha kawei ka ing, haduh ba utei u heprit ba la tip kyrteng kum u Pynhun Umbah ha ka rta kaba 7 snem u la duh ïa la ka jingim bad 4 ngut pat ki la mynsaw kynthup ïa u kpa ka ïing.
Kiwei pat kiba la mynsaw ki kynthup ïa u Kpa u Bah Stolin Khymdeit, 40 snem ka rta, bad lai ngut ki khun u Pynskhem Umbah 16 snem ka rta, u Ebani Umbah 13 snem ka rta bad ka Saphira Umbah kaba 8 snem ka rta.
Sa pule ruh: Ha kyrteng ki khunswet kynnoh shna iing PMAY-G ka longkmie, leit tuklar ka CSWO
Ka jingtip kaba kham bniah, ka dei ruh hadien ba u MLA Ka Mawhati u Bah Charles Marngar tang mar ïa tip halor kane ka jingjia u la hiar mardor sha katei ka shnong ban leit jurip bad kaba sngewsih ka long ba utei u heprit u la duh noh ïa la ka jingim bad kaba kham pangnud ban tip ka long ba ka kmie jongki, ka dang leit kha khun ha Ganesh Das Hospital Shillong bad kam tip satia halor kane ka jingjia tad haduh ba la pyntip na la ïing.
Na ka liang u Bah Charles Marngar kum u MLA, ym tang ba u la wan ban sngewlem bad ban jurip halor kane ka jingjia bad kum u MLA u la pynsted ruh ban ai ka jingïarap sha kane ka longing kaba mad ïa kane ka jingjia ba sngewsih kaba khlem da poi pyrkhat sata kaba la jia tang na ka jingtwa khyndew kaba ktah na ka jingjur slap.
Sa peit ruh
