Na U DC Ri Bhoi Buddien Ka HFU Ban Don Ka Khyrdop Talasi Ia Ki Jingri Ba Wan Na Shabar Jylla

Nongpoh, Naitung 23: Ka Hill Farmers Union Sengkmie bad na Ri Bhoi District mynta ka sngi ki la leit ban kynduh ia u Deputy Commissioner ka Ri Bhoi bad aiti ruh da ka dorkhas ban buddien halor ka jingshah ktha ki nongrep ka jylla na ka jingwan poi ki sniang bad ki syiar bad kiwei kiwei ki jaid mrad sha ka jylla kaba khlem da don kata ka jingtehlakam ne peitngor da ka sorkar  jylla.

Ha kane ka jingleit kynduh la ialam da u General Secretary ka Hill Farmers Union Sengkmie u Bah Alfonbirth Kharsyntiew ryngkat ka jingdon lang u President ka Hills Farmers Union Ri Bhoi Unit u Bah Soiroy Nongkynrih lem bad ki dkhot jong ka.

Kane ka dei ka jingbuddien ka seng halor ka dorkhas ba la dep ai sha u Deputy Commissioner barim ka Ri Bhoi, ba ka seng ka la dawa ba dei ban don ka khyrdop ban talasi ia ki mrad kiba wan na shabar ka jylla ban thelakam naduh ki Sniang, ki syiar, ki masi bad kiwei dei ki mrad kiba wan poi sha kane ka jylla.

Sa pule ruh: Sorkar Sngap Lem Ka Jingkyrpad Jong Ngi Kiba Duk, Haduh Tnum Tap Ka Um, Kynnoh Ba Leh U Mla Mawkyrwat

Kumba la pynpaw da u General Secretary ka Hills Farmers Union Sengkmie u Bah Alfonbirth Kharsyntiew, u la ong ba ka seng ka shim ia kane ka mat, ka dei hadien ba bun ki sniang jong ki nongrep ki la shah ktah ha ka khlam African Swine Fever kaba dei na ka daw ka jingwan poi ki sniang kiba na shabar ka jylla. U la ong ruh ym tang ki sniang kiwei kiwei ki jingri kum ki syiar ruh ki iap ha ka khlaw na ka daw ba wan poi ki syiar na shabar khlem da don ka khyrdop ban tehalakam.

U la ong ruh kaba kham phylla ka long ba ka sorkar kam shym la buh ia ki khyrdop, hynrei ki don pat kita ki briew kiba khrong pisa 15 hajar ia ki Kali heh bad 4 hajar ia ki Kali rit ia kiba wan rah ia kine ki jingri sha ka jylla ba kum ka seng kam tip lane lehseh ioh dei kiba don challan na ka bynta ka khajna sha ka sorkar ne ki dei ki riew shimet.

Namarkata, u la ong ba ka seng ka dawa ba dei ban don ka check point lane kata ka entry point bad ruh ka quarantine ban peit pyrman ia kine ki jingri kiba wan na shabar ryngkat ruh ban don ka Valid Health Certificate naei kine ki jingri ki wan poi bad na ka liang u DC u la ong ba um pat tip satia ia kane ka kam bad un sa shim khia ban tohkit halor kane ka mat ba la wan rah da kane ka Seng Hill Farmers Union, u la bynrap.

Sa peit ruh