Ka samla Lamerphylla Damesha Kharsati ka la wan rah ïaka nam bad ka burom ïa ka jylla bad ka ri baroh kawei hadien ba ka la ïoh ban khur ia ka takma rnong ha ka lympung kaba 23 jong ka Milo Open International Karate Tournament kaba la long ha nongbah Kuala Lumpur jong ka ri Malaysia.
Haba ïakhun ha ka kyrdan Kumite jong ki kynthei kiba don ia ka jingthew kaba 68 kilo, ka samla Lamerphylla Damesha Kharsati ka la pyni ïa ka jingtbit bad ka jingkut jingmut ba kyrpang ha kane ka lympung ïalehkai kaba la pynlong ha Titiwangsa Indoor Stadium naduh ka 26 tarik haduh ka 30 tarik jong u bnai Jylliew, 2024.
Ka jingjop jong ka samla Lamerphylla Damesha Kharsati ha kane ka lympung kaba la wan ban iashim bynta da ki nongiakhun ba tbit na kylleng ka pyrthei, ka pyni sha ka pyrthei halor ka jingtrei minot, ka jingtrei shitom bad ka jinglenlade ka jongka, kaba la wanrah ia ka nam ka burom iaka jylla bad ka ri hi baroh kawei bad kan long ruh ka rynsan ba kan ioh lad ban kiew irat shaphrang ha ki jingiakhun kiban dang wan nangne shakhmat.
kaba long kaba jur bha ka jingiakhun ka long ka jingpynshisha ïaka jingkilan met ka jong ka kaba la neh da ki bnai, ka jingaiti kaba khlem sangeh, bad ka jingminot kaba khlem sangeh. Da kaba khur ïa ka takma Rnong, ym tang ba ka la wanrah burom ïa ka India hynrei ka la pynpaw ruh ïa ka jinglah ban nang kiew shuh shuh haka kam ïalehkai da ka jingkyrshan bad jingïarap kaba bteng.
“Ka jingïakhun ha ka rynsan jong ki ri ka pyrthei bad ban ïoh ïa ka takma ka dei ka mawjam kaba kongsan ha ka jingim jong nga. Nga sngewnguh shikatdei ban ioh ïa ka lad ban mihkhmat ïa ka ri India bad ngan dang ïaleh ban ban leh kham bha shuh shuh ha ki jingkhun kiban sa wan,” la ong ka samla Lamerphylla Damesha Kharsati.
