Kawei na ka jinglehniam tynrai ba pawnam jongka ri lum Jaintia, kaba la tip kum ka Behdienkhlam, ka la sdang noh mynta ka sngi U Blei haka nongbah Jowai. Ïa kane ka jinglehniam kaba la sdang mynta ka sngi, yn pynlong haki saw sngi bad lai miet lynter.
Ki Khon Raij kiba don bynta kyrpang ha kane ka jinglehniam mynta sngi sdang jong kane ka jinglehniam, ki la leit ban shaw ïa Ka Symbood Khnong na ka khlaw kyntang bad leit buh pat ha Kjat Loom Soo Iung kaba don ha Iawmusiang ka bynta mynta shi miet.
Ka bynta ba kongsan jong ka jinglehniam mynta ka sngi ka dei ka jingleh niam kaba la tip kum ka Niam Iong Iung, ha kaba baroh ki rympei ïing ki ai ka nguh ka dem kaba ki khot ka Chyllap ka Chylliang ia ki longshwa ki manshwa hala ki ing kiba la tip kum ki Ing Blei, Ing Kmie lane kita ki Iung Blai/ Kmai Iung. Ia kane ka jinglehniam, ki don ki kur kiba pyndep ia ka jinglehniam mynta ka sngi bad ki don ruh ki kur kiba la dep ban pynlong ha ki sngi kiba la dep.
Ka jingrakhe ia kane ka jinglehniam kaba shongkun bad iphuh iphieng, kaba ju pynlong shisien manla u snem, kan iai bteng ha kine ki saw sngi lynter da ki jingduwai, ki jingleh niam tynrai, ki jingainguh bad kiwei de ki rukom kumba ba la ialam da ki longshwa manshwa ryngkat bad ka put ka tem kaba shongkun Blei.
