Khliehriat, Naitung 28: Ki Dribar Trok kiba dei ki Khasi Jaintia na East Jaintia Hils District bad na kiwei ki District mynta ka sngi ki la leit syndon ban pan jingiarap bad ban ujor sha ki nongialam ka Meghalaya Commercial Truck Owners and Drivers Association (MCTODA), kaba dei halor ka jingkynnoh ba ki shah khñiot bein ha ka Star Cement Company, kaba don ha East Jaintia Hills District Unit.
Kumba la iathuh da kitei kitei ki Dribar Trok ba kit Dewbilat ia ka Star Cement, ki la ong, ba daw kaba la pynlong ia ki ban pan jingiarap na katei ka Association, ka dei namar ba ki shah khniot bein ha ka Star Company ba bunsien ki la pynpaw ia ki jingeh bad namar katei ka Company kam sngap ia ki jingeh ba ki ia kynduh, ki la ujor bad pan jingiarap lem na kane ka Association ba kin tuklar lem na ki bor ba dei peit ka Star Cement.
Ki la pynpaw ruh halor 3 tylli ki bynta kata ka jingeh ba ki ia kynduh ba ka jingai bai bam ka long tang T. 750 shi trip kaba dang duna bha ia ki, kawei pat ba kim ju ai da ka pisa ha kti bad ki shu phah online ba teng teng ki jynjar lyngba ka jingsiew sha ki Account bad sa kawei pat ka long ba ka duna bha ka jingsiew ia ki kaba long tang T.2500 shi trip haba leit ban pynhap dewbilat sha ka jaka kiba ki phah.
Ki la pynpaw ruh ba ki shah khrong ruh wat ha ki bor pulit kaba ki ju dawa 500 tyngka haba ki pynieng Kali ha ki surokbah hap ha Kong Ong bad kane ka jingai duna ka Star Cement ia ka bai trip ka shem jingeh ruh ia ki haba shah dawa pisa ha ki lynti iaid jong ki.
Pule ruh:Khlad Hashen Uwei, Mynsaw Jur Arngut, Pra Phum Ka Scooty Ba Aksiden Ha Umiam
Ia kine ki jingeh, kitei ki Dribar Trok ba niah kali ha Star Cement ki la kynduh ruh ia ki nongialam ka MCTODA na Jaintia Hills ba kynthup ia u Bah Shnabor Suchiang, u Bah Heibor Pariat bad u Bah Ardon Talang ha ka ophis terikam jongki kaba don ha ka shnong Nongsning.
Na ka liang u Bah Shanbor Suchiang, uba dei u General Secretary ka MCTODA na Jaintia Hills Unit, u la ong ba ka seng ka sngewlyngoh ban iohi ba ki Dirbar Trok kiba dei trai muluk trai jylla ki wan ban ujor sha ka seng halor ka jingeh jongki bad ia kane u la ong ba ka seng kan iarap hadien ba la ioh bor na ka sengkmie ba shen ka seng kan thoh da ka dorkhas ban pynpaw ia kane ka jingeh ki dribar trok ba kit dewbilat ha Star Cement sha ki bor ba dei peit jong ka sorkar.
Peit ruh:
Na ka liang u Ardon Talang kum u Adviser ka MCTODA na Jaintia Hills Unit, u la ong ba ka seng ka kloi ruh ban iarap haba shah ktah ki dribar trok kiba dei ki trai muluk ki trai jylla bad tang kawei u kyrpad ia kiba kin ia tylli bad mih ruh kumba 200 ngut ban pynpaw ia ka jingeh khnang ba kin lah ban ia khun pyrshah sha ka Star Cement kaba la leh mynthi ia kine ki jingeh ba ki la pynpaw sha ka kum ka Company.
