Nongpoh, Naitung 27: Ha ka jingjia aksiden ba shyrkhei bad kaba la jia ha por 12:35 ka step 27 tarik ha surokbah Guwahati Shillong ha Umiam hajan Rishatsngi Resort, uwei u samla u la duhnoh ia la ka jong ka jingim bad arngut ki paralok jong u kiba shong ha kajuh ka Scooty kaba don ia u number ML05 AG 7001, ki la mynsaw jur bad kata ka dei hadien ba katei ka Scooty, ka la iatyngkhuh bad kawei pat ka kali, kaba la phet noh bak na katei ka jaka ba la jia ka jingjia aksiden.
Ka tyllong khubor na ki Pulit, la ong ba ki Pulit ka Umiam Police Station, ki la ioh jingtip halor katei ka jingjia bad kiba la leit mar mar ha katei ka jaka ba la don ka jingjia aksiden, ha kaba ki la lap ia lai ngut ki samla kiba la thiah lyngkrang ha surok hapdeng ka jingmynsaw lem bad ka Scooty kaba la pra.
Napdeng kitei ki lai ngut kiba shong ha katei ka Scooty, uwei u samla u la khlad noh hashen namar ba la mynsaw jur ha ki bynta ka khlieh, katba ki arngut pat kiba la mynsaw jur, la pynkit noh sha Civil Hospital, Shillong.
Ha katei ka jingjia aksiden, ki Pulit ki la ia ki katto katne ki dak ha surok, hynrei ki khlem lap shuh ia ka kali kaba la iatyngkhuh bad katei ka Scooty, kumta ki Pulit kin dang pynlong ia ka jingtohkit, na bynta ban lap ia katei ka kali kaba la iatyngkhuh bad katei ka Scooty.
Sa peit ruh
