Nongpoh, Naitung 29: U MLA ka Jirang Constituency u Bah Sosthenes Sohtun bad uba dei ruh u Myntri sorkar ka jylla mynta ka sngi u la lum kyrpang ia ki paidbah ka thain Byrnihat na ka bynta ban pynshai halor ka jingthmu ka sorkar lyngba ka Meghalaya State Pollution Control Board ban buh ia ki kynja kor kynja bor ba la tip kum u WARO-C6 ba la wan rah da ka Company Zero Carbon GTech24 Private Limited na ka bynta ban weng ia ka jingjaboh ka lyer ha ka thain Byrnihat.
Ia kane ka jingialang la pynlong ha Dorbar Hall ka Byrnihat proper ba la wan shim bynta naduh u MLA u Bah Sosthenes Sohtun, u Member Secretary ka MSPCB u Dr. G.H Chyrmang, u Sandeep Sharma u Business Head ka Zero Carbon Tech24 Private Limited, ki nongialam ka Synjuk ki Rangbah shnong, ki rangbah Shnong, ki longkmie bad koi paidbah.
Ha kane ka jingialang la pynshai halor ka jingthmu ban pyndait ia kitei ki kor ki bor kiba dei katkum ka juk stad ba mynta bad la pyni ruh da ki nuksa lyngba ka Slide Presentation ba lyngba ka jingpyndait ia kitei ki bor kan iarap ban pynkhuid ia la lyer jaboh, ha kaba kane ka Company ka la dep leh ruh ha kiwei kiwei ki jylla ka ri kynthup ruh wat ha nongbah Delhi.
Kumba la pynpaw da u MLA u Bah Sosthnes Sohtun u la ong ba kane ka jingshim khia ban wan rah ia kine ki kynja kor kynja bor ban pyndait ha kiba bun ki jaka ha ka thain Nongpoh, ka dei namar ba ka Byrnihat ka la ioh nam kum ka jaka ba jaboh tam ka lyer ha ka pyrthei bad ia kane la shim khi lang naduh ka sorkar, ka MSPCB bad ma u kum u nongmihkhmat ban iatrei lang na ka bynta ban pynkhuid noh ia ka lyer jaboh kaba ktah ia ki paidbah nongshong shnong ha ka thain Byrnihat.
U la iathuh ruh ba u la shim khia ia kane ka kam, ka dei hadien ba iaka Byrnihat la shah pynbna kum kata ka jaka ba jaboh tam ka lyer ha ka pyrthei ba la pynbna da ka Swis (AQI) bad ban shim ia ki lad ki lynti u la shim khia ban thaw ia ki lad ki lynti ban ia kren sha u myntri rangbah halor ka jingdon kane ka Company kaba buh ia kitei ki kor ki born a ka bynta ban ioh ban pynkhuid ia ka lyer jaboh khnang ba kan nym ktah ia ka koit ka khiah ki paidbah ha katei ka thain.
Shuh shuh, u la ong ruh wat la ka sorkar kan sa buh ia kine ki kor ki bor, kan nym mut pat ba ki karkhana ha Byrnihat kin shu leh katba mon bad ki hap ban bud ia ki kyndon ban nym pynmih ia ki jaboh bad ruh ia kane ka kam donkam ruh ban iatrei lang ka sorkar, ka Pollution Board, ki nongshong shnong bad kynthup ruh wat na khappud Assam namar ka jingpynmih lyer jaboh kam dei satia tang ka thain Byrnihat bad bun ruh ki Karkhana na Assam ki pynmih ia ka lyer jaboh kaba ktah lang ia ka jingjaboh ka lyer, u la bynrap.
Sa pule ruh
